Lakay Mindo

[nabulod ti ladawan]

Napili a Daniw Ita a Lawas


LAKAY MINDO
ni Rudy Ram. Rumbaoa


Umil-ilet ti lubong a pagpusiposanda
Mabilbilang kada oras ken tiempoda
Kasta't kabibiag dagitoy nga agasawa
Agbibiagda ngem saanda a tengngel ti garawda.

Kanayon a binigat nga inna sarungkaran
Kaingungotna iti balay pagtaraknan
Saanna a lipatan taraon a pagsangnguan
Agdanggayda a mangan iti lamisaan.

Aginnemen a tawen nga agsagsagaba
Ni Baketna iti sakit a pannakalipat
Nupay saanen a malasin ti asawana
Kenkuana, adda pategna ken ayat.

Marikna ti Lakay nga umil-ilet ti lubongna
Ta saanen a kas idi kabanbanuaganna ti pigsa,
Ta kas met iti kaingungotna, ni Baket Petra;
In-inut metten nga agsalug ti salun-atna

Ngem para iti lakay, napateg ti pannakakita
Iti kaingungotna a nalapsuten ti gawayna;
Nasakit man nga awaten daytoy a kinapudno
Ti Kumpay ni Patay agur-uray ken ni Lakay Mindo.

Iti tunggal panagpitik ti pagorasan
Agari iti barukongna ti napudno nga ayat,
Asi iti kaunggan tunggal kaaddana iti sidongna
Mamalukay iti nabayagen a pannakaulila ken Baketna.

Mapnek ni Lakay Mindo a kasarsarita ti asawana
Uray no di sungbatan ni Baket Petra- ta awan ti masaona,
Saan a mababalaw ti Lakay ti nagbalin a bunga
Ta dina maiturayan ti nagbalin a gasat ni Baketna.

Nagkidem, intangad ti lakay ti rupana iti ngato
Iti mabiit, pumusayto ni Baketna isunto ti sumaruno;
Ngem patienna nga addanto ragsak iti pagtungpalanda
Ket sadiay ituloyda ti mapugsat nga ayan-ayatda.

Insuko ni Baketna ti maudi nga angesna
Inem-em-eman ti Lakay ti ladingit awan mabalinna;
Inawatna a sipupuso natanang ti panunot iti imbulosna
Ta ammona, isu't sumaruno ket masapul nga agsagana.

Kalpasan ti makabulan, nagkupit barukong ni Lakay Mindo
Ammona a daytan ti oras ken tiempo, malagip ti Apo;
Nagkutukot dagiti tumengna, immababa ti panagangesna
Nagtalek iti Namarsua, inkidemna dagiti nalanay a mata.


[copyright by rudy ram. rumbaoa]