Taraon ti Biag...

[nabulod ti ladawan]

Nasantoan a Mabasa:
Pebrero 7, 2011 [Lunes]
Exodus 26
Exodus 27
San Mateo 25: 1-30

Pebrero 8, 2011 [Martes]
Exodus 28
San Mateo 25: 31-46
San Mateo 26: 1-13

Pebrero 9, 2011 [Mierkules]
Exodus 29
Exodus 30: 1-10
San Mateo 26: 14-46

Pebrero 10, 2011 [Huebes]
Exodus 30: 11-38
Exodus 31
San Mateo 26: 47-68

Pebrero 11, 2011 [Biernes]
Exodus 32
Exodus 33
San Mateo 26: 69-75
San Mateo 27: 1-14

Pebrero 12, 2011 [Sabado]
Exodus 34
Exodus 35: 1-9
San Mateo 27: 15-31

Nasantoan a Mabasa Ita nga Aldaw, Pebrero 13, 2011 [Domingo]
Exodus 35: 10-35
Exodus 36
San Mateo 27: 32-66


Mailansa ni Jesus iti Krus
[Mar 15: 21-32; Luc 23: 26-43; Jn 19: 17-27]
Idi rummuarda iti siudad, nasabatda ti maysa a lalaki nga agnagan iti Simon taga-Cirene. Pinilitda a mangawit iti krus ni Jesus. Dimtengda iti maysa a disso a managan Golgota, kayatna a sawen, "Lugar a yan ti Bangabanga."
Inikkanda ni Jesus iti arak a nalaokan iti apro, ngem idi naramananna, dina ininum.

Inlansada ni Jesus iti krus. Nagbibingayanda ti pagan-anayna babaen ti panagbibinnunotda sada nagtugaw a mangbantay kenkuana. Iti ngatuen ti ulona, naisurat ti naipabasol kenkuana: "Daytoy ni Jesus nga Ari Dagiti Judio."
Winingwingiwingan ken nagsasaoan dagiti naglabas ni Jesus: "Kinunkunam a rebbaem ti Templo samo bangonen met laeng iti tallo nga aldaw. Isalakanmo man ngarud ta bagim! No Anaknaka ti Dios, bumabaka man ngarud ita iti krus!"

Nakipagang-angaw met dagiti panguloen a papadi, dagiti mamaestro iti Linteg ken dagiti panglakayen. "Insalakanna dagiti dadduma ngem dina maisalakan ti bagin!" kinunkunada. "Di met aya isu ti Ari ti Israel? No bumaba ita iti krus, mamatitayo kenkuana. No pudno nga agtalek iti Dios ken no isu ti Anak ti Dios, kas kunana, kitaentayo man ngarud no kayat ti Dios nga isalakan ita!"
Kasta met ti pananglais kenkuana dagiti tulisan a kinagiddanna a nailansa iti krus.

Ti Ipapatay ni Jesus
[Mar 15: 33-41; Luc 23: 44-49; Jn 19:28-30]
Iti tengnga ti aldaw, nagsipnget iti intero a daga ket nagpaut iti tallo nga oras. Idi dandani alas tres iti malem, impukkaw ni Jesus iti napigsa a timek: "Eli, Eli, lama sabachthani?" kayatna a sawen: "Diosko, Diosko, apay a binaybay-annak?"
Nangngeg daytoy ti sumagmamano nga adda sadiay ket kinunada: "Denggengyo, ay-ayabanna ni Elias!"
Nagtaray a dagus ti maysa kadakuada a napan nangala iti espongha. Impasagepsepna iti naalsem nga arak sana inkabil iti sukdal tapno ipasepsepna ken Jesus. Ngem kinuna ti dadduma: "Bay-am, kitaentayo man no umay isalakan ni Elias."
Nagpukkaw manen ni Jesus iti napigsa ket nauyosen ti biagna.

Naipigis ti kurtina a naibengbeng iti Templo: naggudua manipud ngato agingga iti baba. Nagginggined, naburak dagiti bato, naglukat dagiti tanem, ket nagungar ti adu a tattao ti Dios, ket rimmuarda kadagiti tanem. Kalpasan ti panagungar ni Jesus, napanda iti Nasantoan a Siudad a nakakitaan kadakuada ti adu a tao.

Nagbuteng ti kapitan ken dagiti soldadona a mangbanbantay ken Jesus idi mariknada ti ginggined ken makitada ti amin a mapaspasamak. Kinunada: "Pudno gayam nga Anak ti Dios daytoy!"

Iti panagadaywen bassit, kumitkita ti adu a babbai- isuda dagiti simmursurot ken nagserserbi ken Jesus manipud Galilea. Adda kadagitoy da Maria Magdalena, Maria nga ina da Santiago ken Jose ken ti ina dagiti annak ni Zebedeo.

Ti Pannakaitanem ni Jesus
[Mar 15: 42-47; Luc 23: 50-56; Jn 19:38-42]

Idi sumipngeten, simmangpet ti maysa a baknang nga agnagan iti Jose a taga-Arimatea ken adalan met ni Jesus. Napan ken ni Pilato ket dinawatna ti bangkay ni Jesus. Iti kasta, imbilin ni Pilato a maited ti bangkay kenkuana. Innala ngarud ni Jose ti bangkay, binungonna iti nadalus a puraw a lupot, ket inkabilna iti agpaay koma kenkuana a tanem a nabiit pay a kinungkongna iti bato. Kalpasanna, nangitulid iti dakkel a bato a pinangserranana iti tanem sa pimmanaw.

Adda sadiay da Maria Magdalena ken sabali pay a Maria a nakatugaw iti sanguanan ti tanem.

Ti Guardia
Iti sumuno nga aldaw, kayatna a sawen, kalpasan ti Aldaw ti Panagsagana, nakiuman ken Pilato dagiti panguloen a papadi ken Fariseo. "Apo," kinunada, "malagipmi nga idi sibibiag pay dayta a mangal-allilaw, kinunana a mapagungarto kalpasan ti tallo nga aldaw. Ibilinmo ngarud a maguardiaan a naimbag ti tanem agingga iti maikatlo nga aldaw amangan no mapan takawen dagiti adalanna ti bangkay sadanto ibaga kadagiti tattao a napagungar ni Jesus. Ta no kasta ti mapasamak, dakdakesto ti maudi a pangallilaw ngem ti immuna."

"Mangalakayo iti guardia," kinuna ni Pilato, "ket pabantayanyo a naimbag ti tanem."

Iti kasta, pimmanawda ket napanda sinerraan a naimbag ti tanem babaen iti panangmarkada iti bato a rikepna, ket nangibatida kadagiti soldado a mangguardia.