Taraon ti Biag...

[nabulod ti ladawan]

Nasantoan a Mabasa:
Pebrero 21, 2011 [Lunes]
Leviticus 11
Leviticus 12
San Marcos 5: 21-43

Pebrero 22, 2011 [Martes]
Leviticus 13
San Marcos 6: 1-29

Pebrero 23, 2011 [Mierkules]
Leviticus 14
San Marcos 6: 30-56

Pebrero 24, 2011 [Huebes]
Leviticus 15
Leviticus 16: 1-28
San Marcos 7: 1-23

Pebrero 25, 2011 [Biernes]
Leviticus 16: 29-34
Leviticus 17
Leviticus 18
San Marcos 7: 24-37
San Marcos 8: 1-10

Pebrero 26, 2011 [Sabado]
Leviticus 19
Leviticus 20: 1-21
San Marcos 8: 11-38

Nasantoan a Mabasa Ita nga Aldaw, Pebrero 27, 2011 [Domingo]
Leviticus 20: 22-27
Leviticus 21
Leviticus 22: 1-16
San Marcos 9: 1-29


Agbalbaliw ti Langa ni Jesus
[Mat 17: 1-13; Luc 9: 28-36]

Kalpasan ti innem nga aldaw, inkuyog ni Jesus da Pedro, Santiago ken Juan ket is-isuda a simmang-at iti maysa a bantay. Idiay, nagbalbaliw ti langa ni Jesus iti imatangda. Nagraniag unay dagiti pagan-anayna ket makapurar ti pudawna. Awan ditoy lubong ti siasinoman a makapapudaw kadakuada a kas iti kapudawda.

Pagammuan, nagparang kadakuada da Elias ken Moises a makisasao ken Jesus.

Bimmallaet ni Pedro ket kinunana ken Jesus: "Maestro, nagsayaaten ti kaaddatayo ditoy! Mangbangonkami ketdi iti tallo a kalapaw: maysa iti para kenka, maysa ti para ken Moises, ket ti maysa para ken Elias."

Napnoan ngamin dagiti adalan iti siddaaw ken buteng ket saan nga ammo ni Pedro ti tumutop a sawenna.

Nagparang ti ulep a nangsalinong kadakuada ket adda nangngegda a timek a naggapu iti ulep, "Daytoy ti Anakko a dungdungoek," kinunana. "Dumngegkayo kenkuana."

Dinagdagusda nga inwaras ti panagkitada, ngem awan sabali a nakitada no di laeng ni Jesus.

Idi sumalsalog ni Jesus ken dagiti adalanna iti bantay, imbilinna kadakuada, "Awan pangibagbagaanyo iti naimatanganyo. Ibagayonto laeng daytoy kalpasan ti panagungar ti Anak ti Tao."

Tinungpalda dayta a bilin, nupay nagsisinnaludsodda, "Ania ti kayat a sawen ti panagungar kadagiti natay?"

Inintuodda kenkuana: "Apay a kuna dagiti Mamaestro iti Linteg a masapul nga umay nga umuna ni Elias?"
"Wen," insungbat ni Jesus, "umay nga umuna ni Elias tapno tarimaanenna amin a banag. Ngem apay a nailanad iti Nasantoan a Surat nga agsagaba iti napalalo ket maumsinto ti Anak ti Tao? Ibagak kadakayo nga immayen ni Elias, ket inaramidda kenkuana ti amin a kinaykayatda, kas naisurat maipapan kenkuana."


Paimbagen ni Jesus ti Ubing a Linuganan ti Dakes nga Espiritu
[Mat 17: 14-21; Luc 9: 37-43a]

Idi nagsubli ni Jesus ken dagiti tallo a kinakuyogna iti yan dagiti nabati nga adalan, nakitada ti nakaad-adu a tao sadiay. Adda sumagmamano a mamaestro iti Linteg a makisinsinnupiat kadagiti adalan. Apaman a nakita dagiti tattao a sumungad ni Jesus, naragsakanda ket nagtatarayda a kimmablaaw kenkuana.

"Ania ti pagsusupiatanyo?" sinaludsod ni Jesus.

"Maestro," kinuna ti maysa kadagiti tattao, "inyegko kenka ti anakko a lalaki a linuganan ti dakes nga espiritu, itublakna ti ubing. Aglabutab ti ngiwatna, agngariet ket sumkil ti entero a bagina. Kiniddawko kadagiti adalam a paksiatenda ti dakes nga espiritu, ngem dida nabaelan."

"Tattao nga awanan pammati!" kinuna ni Jesus kadakuada. "Kasano pay kabayag ti kaaddak iti dennayo? Kasano pay kabayag ti panaganusko kadakayo? Yegyo man kaniak ti ubing."

Inyasidegda kenkuana ti ubing. Apaman a nakita ti dakes nga espiritu ni Jesus, pinagkuyegyegna ti ubing. Napasag ti ubing iti daga, naggulgulagol nga aglablabutab ti ngiwatna.

"Kaano ti sipudna a kastoy ti maar-aramid kenkuana?" sinaludsod ni Jesus iti ama ti ubing.

"Sipud pay kinaubingna," insungbat ti amana. "Masansan nga isebba ti dakes nga espiritu iti apuy wenno ilemmesna iti danum tapno patayenna. No kabaelam, pangngaasim ta tulongannakami."

"Apay a kunam 'No kabaelam'?' kinuna ni Jesus. "Amin a banag kabaelan ti tao nga adda pammatina."

"Mamatiak," dagus nga inyikkis ti ama. "Punnoam ti pagkurangan ti pammatik."

Nadlaw ni Jesus dagiti tattao nga agdidinnuron nga umasideg kenkuana. Binilinna ti dakes nga espiritu, "Sika a tuleng ken umel nga espiritu, pumanawka itoy nga ubing ket dimo subsublianen."
Nagikkis ti dakes nga espiritu, pinagkissiwna ti ubing sa pimmanaw. Kasla bangkayen ti ubing ket adun ti nagkuna: "Natayen!"

Ngem iniggaman ni Jesus ti ima ti ubing sana binangon. Timmakder ti ubing.

Idi nakastreken ni Jesus iti balay, sinaludsod a sililimed dagiti adalanna, "Apay a dimi mapaksiat ti espiritu?"

"Saan a mapaksiat dayta a kita ti espiritu," insungbat ni Jesus, "no di laeng ti panagkararag."