Ti Panangsubbot

Napili a Daniw Ita a Lawas

[nabulod laeng ti ladawan a naaramat]

Ti Panangsubbot
ni Rudy Ram. Rumbaoa
[nasurat.4.8.12.maui]

Dagiti narabsut ken naibunong matipontiponda
Iti Zion, maisubli dagiti tagabu a nailako
Nga awan bayadna. Ket agparang dagiti sinan-papadi
A nagkawes iti sotana-pangritual bayat dagiti an-annak
Dagiti pampamilia ti mawayawayaan
Ti mangidaydayaw ken agkansion ti paskua
Iti Kangatoan a Dios kas pagyaman Kenkuana.

Karkartingan dagiti tattao a di mamati
Iti panangitag-ayda ti banderita ket papigsaen
Ken agsagana para iti gerra, ket dagiti managanito
Ti mapagelan nga agdawat iti umento tapno maikasaba 
Dagiti ar-artiok a balikas manipud bibig
Ken pannakabaludda iti tapok. Ket iti barukong
Ti plato a kawes ti kinalinteg- maitutop.

Dagiti impertinente a kabusor ti agkalikagum
A mangiringpas ti biag-panamati ket saludsodendanto
No kasano't kabayagna ti inda panaguray, ngem nabantot
Ti panunot ken pisikal a bagi ta kasla maiwalin ken awan
Serserbina iti agnanayon ta ti Dios isu't tumulong
Kadagiti nababa nga agtagikua ti pagbiagan- Salaknibanna
Dagiti nakukurapay ngem naemma kadagiti nasisiglat.

Itednanto kadagiti tattao a naibelleng ti kalinteganda
Nga agtawid ket ti pannusa a linak-am dagiti masakit,
Maitedto kadakuada ti napigsa nga ima; agisaknap iti didigra
Ti tunggal insekto ta adda kadakuada ti pannakabalin
A mangungaw ti nakaparsuaan, ngem agsulbodto ti kinasadiwa
Iti aglawlaw babaen iti bendision ti patriarko.
Ket dagiti gangannaet masinitdanto iti napalalo a pumada
Iti nadagaang a lugar ken angsenda ti napalet nga angin.

[copyright.april.2012.by.rudy.ram.rumbaoa]