Pito a Mensahe iti Pito nga Iglesia

Napili a Daniw Ita a Lawas

[Nabulod laeng ti ladawan a naaramat iti daniw]

Pito a Mensahe iti Pito nga Iglesia
ni Rudy Ram. Rumbaoa
[nasurat.4.11.2006/maui]


Efeso-
Ammo ti Dios dagiti aramidmo
dagiti panagbannog ken panagituredmo a siaanus.
Dimo maanusan dagiti dakes a tattao,
sinuotmo dagiti agkuna nga apostolesda
ngem naduktalam nga ulbodda.
Inturedmo dagiti rigat ket saanka a naupay
ngem agbabawika ket aramidem ti inaramidmo kas idi damo,
ta no saan, ikkatenna ti pagsilawan iti nakaisaadanna.

Ermirna-
Adda pakariribukam.
Napanglawka, ngem iti kinapudnona, nabaknangka!
Padpadaksendaka.
Suotennaka ti Diablo
ngem dika agbuteng iti sagabaem,
agtalinaedka koma a napudno uray pay no isu't
pakatayam,
maitedto kenka ti korona ti biag!

Pergamo-
Agnaedka iti trono ni Satanas,
ngem napudnoka ket dimo binaybay-an ti pammatim.
Ngem sumagmamano kadakayo ti agrukbab kadagiti didiosen
mangan kadagiti taraon a naidaton
ken agar-aramid iti kina-immoralidad.
Agbabawika ngarud kadagiti basbasolmo,
no saan, magubat dagiti tattaom babaen ti kampilan.

Tiartira-
Ammo ti Dios ti ayat ken pammatim,
ti panagserbim ken ti anusmo.
Ngem pinalugodam ni Jezebel,
maysa a babai a pinanaganada iti profeta.
Yaw-awan ken isursurona dagiti tattao a makikamalala,
mapapatayto dagiti sumurot ken pasurotna.
Masapul nga agbabawida kadagiti basbasolda
ta no saan, maidalitdanto iti pagiddaan
ket agsagabadanto iti nakaro kadagiti kinakamalalada.

Sardis-
Agdindinamag a sibibiagka uray no nataykan!
Isu't gapuna nga agriingka ket papigsaem ti nabati pay kenka.
Adda pagkuranga dagiti aramidmo
laglagipem dagiti nasursurom ken nangngegmo:
tungpalem ida.
No dika agriing, umayto ti mannanakaw
ket dimonto maammuan uray ti oras a yuumayna.

Filadelfia-
Nangikabil iti sangom iti silulukat a ruangan
nga awan ti makairikep: bassit ti kabaelam.
Ngem sinalimetmetam dagiti saona
ket saanmo nga inlibak ti naganna.
Agsipudta sinalimetmetam ti naganna,
aywanannakanto iti tiempo ti riribuk nga umay
iti intero a lubong a mangsuot iti amin a tao ditoy daga.
Aluadam ngarud ti adda kenka
tapno awan ti manggaraw iti gunggonam!

Laodicea-
Kunam a nabaknangka ken narang-ayka ket adda amin a masapulmo,
ngem dimo ammo a daksanggasatka ket kakaasika:
napanglawka,
lamolamoka,
bulsekka.
Denggem, agtakderto iti ruangan ket agtuktukto.
Ti siasinnoman a makangngeg iti timekna
luktanna ti ruangan ket sumrekto iti balayna
tapno agsangoda iti panganan.

[copyright.by.rudy.ram.rumbaoa]