 |
| [Nabulod laeng ti ladawan a naaramat iti daniw] |
[Ta] Sika ti Kakaisuna
ni Rudy Ram. Rumbaoa
[nasurat.7.21.12.maui]
Ta Sika ti Kakaisuna, ti umuna
Iti tunggal numero; ti pondasion
Iti tunggal pasdek ta Sika ti Kakaisuna,
Awanan mulit ket misterio iti kinamaymaysa
Ti tallo isu't sirib a linaon ti puso
Ta nailimed daytoy kadagiti tattao.
Ta Sika ti Kakaisuna, ti bugbugtong
Ket awan ti asino man a mamasirib
Iti nakasirip iti daytoy naindaklan
Nga aramidmo. Ti siribmo, siribmo,
Ket saanto a mayababa wenno mayatiddog.
Awan mamaay ti kinaawan wenno kinakurang,
Ngem agtalinaeddanto latta nga adda
Iti nalablabes, ta Sika ti Kakaisuna, a saan ketdi
A kas iti rugi ti panagbilang tapno maiggaman
Wenno mapetpetan, ta para kadagiti numero;
Saanda a mabaliwan a gaw-aten,
Maabutan wenno danonen.
Ta Sika saan a sirmata, wenno maysa laeng a pigura.
Ta Sika ti Kakaisuna nga adda iti amin a labes wenno
Linia a pagpatinggaan ti maysa a sirkulo
Wenno kaarngi a sukog iti imahinasionko.
Ngarud, bantayak ti bagik iti pananggita ti basol
Ti dilak, ta Sika ti Kakaisuna, ta Sika ti Kangatoan
Iti amin a madayaw iti labes ti napaadda:
"Siasino ti makarippuog iti kakaisuna nga umuna a numero?"
[copyright.by.rudy.ram.rumbaoa]
No comments:
Post a Comment