Ipaaymo Kaniak [Ta Pudno a Kasapulanka]

Napili a Daniw Ita a Lawas

[Nabulod laeng ti ladawan a naaramat iti daniw]

Ipaaymo Kaniak [Ta Pudno a Kasapulanka]
ni Rudy Ram. Rumbaoa
[nasurat.1.3.2007]

Iti bagik-
Kawaw, mailubo kadagiti pannubok.

Iti panunotko:
Naturay ti lubong
Ta diak man maliklikan
Sangkatukel a sulisog-
Pataudenna't dakes nga aramid
Ket isawangna agkakaalas a balikas.

Iti pusok:
Nauyaw ken managdillaw
Awanan asi, saan a manangilala-
Saktanna't rikna sabali.

Ngem ammok a mannakaawatka
Ken manangilala kadagiti padak
A naiwawa-
Mamakawanka ta Sika ti kamangan
Dagiti nailubo a kararua
Iti dana a taltalaytayenda,
Dinakanto kabaelan a rebbaen
Ti pannakabalin ti asino man
Ta Sika ti Pudno, ti Dana
Ken ti Biag.

Ngem siak?
Anak ken nanumo nga adipenmo
Adu unayen ti innak pakariribukan,
Ania't maisubalitko a pakaay-ayoam
Kadagitoy ayat nga it-itdem kaniak?

A, idawatko nga ipaaymo kaniak
Ta pudno a kasapulanka-
Ti bara ti arakupmo
Ti naturay a balikasmo
Riknaek dayta puso
Dalusam ti dakes kaniak
Tapno maipasngay ti ayat.

Idawatko Kenka
Ita ken iti agnanayon.
Pudno a kasapulanka
Iti inaldaw-aldaw;
Dinakto koma panawan
Wenno baybay-an
Silnagam ti dana
A pagnaak tapno makitak
Ket maaramidkonto ti pagayatam.

[copyright.by.rudy.ram.rumbaoa]