Silaw ti Biag

Napili a Daniw Ita a Lawas

[Nabulod laeng ti ladawan a naaramat iti daniw]

Silaw ti Biag
ni Rudy Ram. Rumbaoa
[nasurat.8.18.2006/maui]

Gangtam
ti pagsaingan
tapno iti aglawlawmo
masilawan,
dimo ngarud ipan
ti pagsaingan
iti sirok ti lamisaan
ta dikanto ket makauram.

Wen, gangtam
ti pagsaingan
ket iparabawmo
iti lamisaan
tapno amin nga aglalawmo
masilawan,
dimo ngarud ipan
ti pagsaingan
iti sirok ti lamisaan.

Ti pagsaingan
no gangtam,
iparabawmo
iti nakairantaan
tapno sipnget
iti aglawlawmo
masilawan
ken makitam
ti dalan a papanam.

Gangtam ngarud
ti pabelo ti pagsaingan
tapno iti aglawlawmo
masilawan,
ket ti panunotmo
iturongnaka't umno a dalan
ken dagiti dadduma
inka maparanudan
iti rangrang ti pagsaingan
a ginangtam.

Ti silaw ti biag
masapul a magangtan,
di rumbeng a mapuyupoy
wenno maiddep:
masapul ketdi nga agrangrang!

[copyright.by.rudy.ram.rumbaoa/august2006]