[Nabulod ti ladawan a naaramat] |
"adda dagiti dakes a panagem,
aramid isudat' pakasaktan nakem
ket uray maminribu a nakabasolka
no dimo ammot' agbabawi
sikanto latta ti sika!"
Ti naimbag a mamagbaga
ibuksilannat' adda't panunotna
mangaramid napintas a pagtuladan
tapno isut' agbalin a pagulidanan;
ta kas iti bukel ti mostasa
no mamimula, dumakkel-agbunga
bussogenna ti sibubukel a kagimongan.
Ngem no bilang maibiat ti pana
ket maiturong iti papananna
sadiay agdisso, saanen nga agsubli kenka
dagiti masugatan isudat' makariknat' ut-otna.
Asino ti agparbeng ken umanamong
agtamed-agkurno't parsua arignat' kanunong?
Awan! Ti gasat ti tao dimo maipadtoan
padapadatayo a rituer a kasla nabuong a pinggan.
Adda met serbi ti kanayon nga ariyakyak
ta datayo amin makapaggarakgak
ngem ti pagdaksanna, no ti bibig maarkosan gita
sawenna dagiti balikas a mangsagmak kenkuana.
Ngem saan a kasta ti pangiladawak kenka
saan met a kasta ti panangipapanko kenka,
ti makunak dagiti saan a makangeg ken di makakita
wenno di makaapros dida ammo ti ar-aramidenda.
Nengneng ti sipapanunot a sumrek a dina ammot' pagruaranna
laglag no mabatina ti tulbek iti uneg ti pagtaenganna-
ngem asino ngarud ita ti agsasao ti pudno
iti aramid saan nga umisu, magasangan agsidat' silit' sairo?
Adut' agibagbaga ti kappia
nalawag nga isuda't adut' kabusorna;
wen agpayso, napintas a denggen ti kanta
no la ketdi saan a disintonado ti agkanta.
Ala wen, padapadatayo a mangpanunot ti naimbag
ngem awan serbi amin dagitoy iti saan a makaw-awat,
ngem no kunam a daytoy ti inka idawat
rugiam ngaruden nga iparikna ti pateg ti ayat!
Ket no pudno awagannak iti gayyem
maibasura koman dagensen-sakit ti nakem,
ti ama ipangpangrunana nga umuna
ti panangatibayna sibubukel a pamilia.
Dagiti agpapagayam uray manot' aglabas a tawen
saanda a masair ken matuokan iti adu a sawen,
kapamilia wenno kapuso, dayta ti rumbeng
itanem susik rugian mamuli pudno a panagpipinnateg.
Wen, maibanag amin dagitoy a dawdawat
agngudo koman dagiti banag a mangrakrak,
kas kenka, isuna ken isuda- taoak met, adda pagkurangak
no adda nakasaktak kenka, ala, pakawanennak.
Ket wen, saan koma agtalinaed a kasta
saan a padapadat' dalan a turongen, adda sumiasi latta
ngem ti dios adda sadiay mangidalan sadino a papananta
awatek dakulapmo, riknaem nabara a pannakiabrasa!
awatek dakulapmo, riknaem nabara a pannakiabrasa
rudy ram. rumbaoa
www.samiwengkenayatnirudy.blogspot.com/wwwtaraontibiag.blogspot.com
[c]09.25.2007
No comments:
Post a Comment