[Nabulod ladawan a naaramat]
"Pinalagipanka, ngem nagbalinak a tubengmo: inyad-addam nagkatangkatang, nagal-alawaaw aramid a paggartemam; binaludnaka dagiti bisio agingga a nayaw-awankan iti pagturongam, nagpapasam nagduduma a ragsak iti nakiro a lubong, nalipatam pamiliam"
Garampingat samiweng iti tangatang Kumpasan nagduduma maris-silaw di makamulagat, Iti entablado agsalsala agaw-awis a sulisog Kaykayatmo paayusan karabukob arak nga ilidok.
Iti kuarto, manglangit nabuyok nga asuk Arignat' simborium ipug-aw adik ken biangot, Dagiti padam nayaw-awanen sabalin naturong Masakbayan a naigaga nagbalinen a buong.
Di agtalna dayta panunot kasla mapungot Umisem-agpaggaakka kinimkimanen buot, Langam ti agballa no mausawan-awanen epektona Maipawil a droga mamagkalma ti rikna.
Kunam a siak ti tubeng, ngem laglagipem Diak nagkurang pammagbagak inallilawmot' panawen; Yik-ikkismot' panagbabawi ania pay maaramidam Nalpasen ti nalpas anusam agbiag uneg pagbaludan.
Ala, adda met ragsak dita nagtungpalam Ta adda gundawaymo a nagbasol mangabaruanan, Saan a dita ti paggibusan, ngem isut' pagrugianan Lintegem biddut tapno malawagan dayta nagan.
Nupay nalpasen a naperdi ti masakbayam Padasem ukkonen namnama a binaybay-am, Sadiay mariknam pateg ken ayat pamiliam Ta maited met kadagiti nailaw-an ti pammakawan!
"Laglagipem: Adda dagiti pannubok iti biag umar-arubayan Naangaw ni Gasat, isagmaknaka ngem mabalin a liklikan, Bay-am a mapasag-maitanem nagbiddutam a kalman Tapno dagiti ariangga ti garampingat a samiweng aggibusdan..."
MAITED MET KADAGITI NAILAW-AN TI PAMMAKAWAN Rudy Ram. Rumbaoa Dagiti Koleksion a Daniw, Sarita, Kanta ken Dadduma Pay www.samiwengkenayatnirudy.blogspot.com/ wwwtaraontibiag.blogspot.com [cr]11.10.2007
|
No comments:
Post a Comment