[Nabulod ti ladawan a naaramat] |
Ni kaanoman saan nga agnanayon
nga agtaeng dagiti tedted ti tudo,
wenno agbati dagiti marakapas
nga aglabas nga ulep, wenno ipalubos
ti bullalayaw a masagid ti asino man
ta isu ti arko ti nalawa a tangatang.
Nupay kasta, ni kaanoman
saan a pumanaw ti dissuor
iti panawen ti panagrururos,
wenno pilkuen ti angin dagiti ruot
nga adda iti nababa a lugar
a mangted ti saan a maibaga a rason.
Adu a dana ti turongen
dagiti panagaksawtayo
iti salinong ti naabbongan
a langit, ditoy ipakita ti tao
nga agbibiag, aggaraw, mataraonan-
masarakantayo dagiti rason, apay...
Dika koma mabannog
no agbaniaga iti adayo
ta babaen iti naannad
a panangplano ti Namarsua
ti uniberso, kabaelantayo
a sagiden uray pay
ti kararua dagiti sabong,
ta napatpategtayo ngem isuda.
NAPATPATEGTAYO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
No comments:
Post a Comment