SIKAT' PIGSAK [Ti Pagbiagak]

[Nabulod ti ladawan a naaramat]


Kaarigkot' pitak
naigamer iti babak
ti basol a namulagatak
ti lunod a nagtaudak.

Ngem, agbabawiak
rebbengna nga agpakawanak
iti biddut a naaramidak
gapu ta Sika ti Apo-
ti pagbiagak.

Nawaw ken nabisinanak,
impaaymot' biag
a taraon 'toy kararuak;
napnekak
ta linemmesnak iti ayat!

Idi bulsekak-
linuktam ti matak.

Idi nayaw-awanak-
inturongnak, kinibinnak.

Idi naidalebak-
binangonnak, sinakroynak.

Idi nasugatak-
inagasannak.

Natnagak
ngem sinippawnak,

Kenka, O Apo,
Sika ti pigsak
ti anges ti kararuak-
ti pagbiagak!



SIKAT' PIGSAK [Ti Pagbiagak]
Rudy Ram. Rumbaoa
wwwtaraontibiag.blogspot.com
[CR]11.30.2008