Sino Ita ti Mangriing ken ni Patay?

[nabulod ti ladawan a naaramat]

sino ita ti mangriing ken ni patay? ti saan nga agressat

a pannakaibukbok danum-baybay iti labes ti tunggal

nasipnget a suli ti lubong, ti pannakaitagbat ti nasilap

nga espada, ti nanglaylayen a mula ken awis kenka

sadiay ti rono dagiti bulong, ti gumilgil-ayab nga apuy,

ken isu amin a langa ti kinadakes. iti garangungong ti angin

makatikaw ti panagtaul ti aso nga adda iti sanguanam

ket mapagbiddutam ti anghel a magmagna iti kalsada.

nasarakak daytoy a sabong ti rosas iti dalan ket kunak:

iti uneg ti sirkulo ti lawag ti pagorasan ti siitan a dios,

itedko kenka, ilatagkot' bagik iti naraber a karuotan-

agdeppaak, agal-alak iti nakabutbuteng, pumaspas

panagbitek pusok, ngem agparintumengak iti sakaanam

tapno dawatek a bay-annak nga agmaymaysa; diak kayat

a masingaka iti kasta unay a panangparparigatmo kaniak.

ngem sino ita ti mangriing ken ni patay? ininumko 

ti nangisit a dara iti kopa, nagraniag ti bulan nga awan

nakadlaw; nalabit, saanak a pimmusay ngem nagtubo

ti nakaberberde a mula ti bain-bain iti aglawlaw,

dagiti siitan a kayo ken itutupuar ti agsilud nga insekto-

ti nangrugian ti maysa nga abut nga awan pakausaranna,

rimmubrob ti apuy ket madarang iti bara ti kasta unay 

dagiti magna iti dayta a dalan; agikkis ken agsangitda

iti napalalo ngem agpusaksak ti rupa ken maay-ayatan

ti demonio ket naggudua ti nakuridemdem a lawag ti bulan.

sino ita ti mangriing ken ni patay?

rudy ram. rumbaoa

dagiti koleksion a daniw, sarita, kanta ken dadduma pay

wwwtaraontibiag.blogspot.com/www.samiwengkenayatnirudy.blogspot.com

[cr]07.08.2012