Mangiburayka [Uray Sangkabassit Nga Adda Kenka]

[Nabulod ti ladawan a naaramat]


Mangiburayka uray sangkabassit
nga adda kenka, ti naimpapusoan
a gameng, ti makaabbukay nga isem--
ta kaarigdat' rangrang ti init
a mangsirap iti asul a tangatang
iti ruar ti nabalitokan a tagipuro

Wen mangiburayka uray sangkabassit
nga adda kenka kadagiti agsagsagaba
a kararua ta nagbiddutda met
a kas kenka ket saanda a mabirokan
dagiti banag a mangtunton ti
pudno a kaipapanan ti biag,
ket uray bassit, mamalukay
ti sagutmo kadagiti dagensenda

Mangiburayka uray sangkabassit
nga adda kenka kadagiti adayo
iti pusom tapno masalbar ti pada
a parsua, iparikna ti nabara
a pannakipagladingit,
aramiden ita ken iti masakbayan

Ti ragsak nga iburaymo ragsak met
a maawatmo, mabalin a saan
nga ita, wenno inton bigat
ngem kadagiti aldaw a masungad--
uray sangkabassit ti maiburay,
bendision ti inka malak-am
ti iburay a ragsak iti kaaduan.




MANGIBURAYKA [URAY SANGKABASSIT NGA ADDA KENKA]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
[cr]o7.14.2o11