Mabasa Ita nga Aldaw
Umuna: 2 Samuel 3
Maikadua: Jeremiah 9
Ebanghelio: San Mateo 20
Dagiti Mangmangged iti Kaubasan
"Mayarig ti Pagarian ti langit iti tao nga adda kaubasanna. Nasapa a rummuar a napan nagbirok iti tangdananna nga agtrabaho iti kaubasanna. Nakitulag kadagiti tattao a tangdananna ti tunggal maysa kadakuada iti maysa a denario iti maysa nga aldaw sana ibaon ida iti kaubasanna.
Napan iti tiendaan iti alas nuebe, ket nakitana ti sumagmamano a lallaki nga agtatakder. Kinunana kadakuada, 'Inkayo met agtrabaho idiay kaubasan ta itedkonto ti rumbeng a tangdanyo.'
Iti kasta, napanda. Rimmuar manen iti alas dose, ken iti alas tres. Idi dandani alas singko, napan iti tiendaan ket nakitana ti sumagmano a lallaki nga agtatakder. Kinunana kadakuada, 'Apay a daddadaelenyo ti tiempoyo nga agmalmalem ditoy?'
'Awan ngamin pagtrabahuanmi,' insungbatda.
Kinunana kadakuada, 'Inkayo met agtrabaho iti kaubasan.'
Idi sumipngeten, kinuna ti akinkukua iti kaubasan iti taltalkenna, 'Ayabam dagiti mangmangged ta tangdanam ida. Irugim kadagiti naudi a simrek.'
Natangdanan iti maysa a denario ti tunggal maysa kadagiti nangrugi a nagtrabaho iti alas singko. Idi napan dagiti immun-una a naayaban, ipagarupda nga ad-adu ti awatenda; ngem naipada met iti tangdanda kadagiti naud-udi. Inawatda ti tangdanda ngem dinayamudomanda ti nagpatrabaho. Kinunada, 'Maysa laeng nga oras ti panagtrabaho dagitoy naudi a simrek; ngem dakami a nagmalmalem a nagkapkapudotan, impadam ti tangdanmi.'
'Gayyem,' kinuna ti akinkuaiti kaubasan iti maysa kadakuada, 'saanka a sinaur. Immannamongka iti maysa a denario a tangdanmo iti maysa nga aldaw. Alaem ti tangdanmo ket pumanawkan. Kayatko nga ipada ti tangdanmo iti itangdanko iti naudi. Awan aya kalintegak a manggasto iti kuartak kas iti pagayatak? Wenno, umapalka kadi agsipud ta naparaburak?'
Inggibus ni Jesus: "Ngarud, umunanto dagiti maudi, ket maudinto dagiti immuna."
________________________________________________________________
No comments:
Post a Comment