Taraon ti Biag...

Nasantuan a Mabasa:

Agosto 17 [Lunes]
1 Kings 12
Jeremiah 38
San Marcos 12

Agosto 18 [Martes]
1 Kings 13
Jeremiah 39
San Marcos 13

Agosto 19 [Mierkules]
1 Kings 14
Jeremiah 40
San Marcos 14

Agosto 20 [Huebes]
1 Kings 15
Jeremiah 41
San Marcos 15

Agosto 21 [Biernes]
1 Kings 16
Jeremiah 42
San Marcos 16

Agosto 22 [Sabado]
1 Kings 17
Jeremiah 43
1 Corinto 1-2

Nasantuan a Mabasa Ita nga Aldaw, Agosto 23, 2009 [Domingo]
*Umuna a mabasa naadaw iti Umuna a Libro dagiti Ari 18
*Ti maikadua a mabasa naadaw iti Libro ni Jeremias 44
*Ti Nasantuan nga Ebanghelio Ita nga Aldaw,
naadaw iti Umuna a Surat ni San Pablo kadagiti taga-Corinto 3

Dagiti Pada nga Agserserbi iti Dios

Kinapudnona, kakabsatko, saanko nga iimpada ti panagsaok kadakayo iti panagsaok kadagiti tattao nga addaan iti Espiritu. Nagsaoak kadakayo a kas tattao iti lubong, kas ubbing iti nakristianoan a pammati. Gatas ti impainumko kadakayo, ta diyo pay mabalin ti mangan iti natangken a taraon. Agpapan ita, saankayo pay a nakasagana ta agbibiagkayo pay laeng a kas tattao iti lubong. Wen, ipaneknek ti panagiinnapal ken panagririyo a tattaokayo iti lubong nga agbibiag kas mayannurot iti alagaden ti lubong.
No adda agkuna kadakayo, "Kaduak ni Pablo," ket adda met agkuna, "Kaduak ni Apolos," diyo kadi iparangarang a tattaokayo iti lubong?

Siasino aya ngamin da Apolos ken Pablo? Agppapadakami nga agserserbi iti Dios. Babaen kadakami, namatakayo. Aramiden laeng ti tunggal maysa ti impakumit ti Apo kenkuana. Siak ti nagmula, ni Apolos ti nagsibug; ngem ti Dios ti nangpadakkel iti mula. Saan nga importante no siasino ti nagmula wenno ti nagsibug. Ti Dios ti nasken agsipudta ta isu ti mangpadakkel iti mula. Awan giddiat ti agmula ken ti agsibug; gungunaanto ti Dios ida segun ti inaramid ti tunggal maysa. Ta agkakaduakayo nga agserserbi iti Dios, ket dakayo ti talonna.

Dakayo pay ti patakder ti binangon ti Dios. Babaen iti panangaramatko iti insagut ti Dios kaniak, nagtrabahoak a kas maysa a nalaing nga agpatpatakder. Impasdekko ti fondasion, ket sabali met a tao ti agpatakder iti rabawna. Ngem naannad koma ti panagpatakder ti tunggal maysa. Ta inkabilen ti Dios ni Jesu-Cristo a kas maymaysa ken kakaisuna a fondasion, ket awanen sabali. Adda agaramat iti balitok, pirak wenno dagiti napapatek a bato iti panagpatakderda iti rabaw ti fondasion. Kayo, ruot wenno garami ti usaren met ti dadduma. Makitanto ti klase ti trabaho ti tunggal tao inton iparangarang ti Aldaw ni Cristo. Ta babaen ti apuy iti dayta nga aldaw, makitanto ti trabaho ti tunggal tao; matennebto iti apuy ket maammuanto ti pudno a klasena. Magungunaanto ti tao no makalasat iti apuy ti binangonna iti rabaw ti fondasion. Ngem no mauram ti trabaho ti maysa a tao, mapukawnanto. Nupay kasta, maisalakanto met laeng a kasla nakalasat iti uram.

Diyo kadi ammo a dakayo ti templo ti Dios, ket agtalinaed ti Espiritu kadakayo? Ngarud, ti siasinoman a mandadael iti templo ti Dios, dadaelento met ti Dios. Ta nasantuan ti templo ti Dios, ket dakayo a mismo ti templona.

Awan koma ti mangallilaw iti bagina. Siasinoman a mangipagarup iti bagina a masirib, babaen iti alagaden ti lubong, agbalin koma a maag tapno agbalin a napaypayso a masirib. Ta minamaag iti imatang ti Dios ti amin nga ibilang ti lubong a kinasirib. Kas kuna ti Nasantuan a Surat: "Ipalab-og ti Dios dagiti mamasirib iti kinasikapda." Kunana pay, "Ammo ti Apo nga awan serserbi ti panunot dagiti mamasirib." Ngarud, di koma pagpasindayag ti tao ti kabaelanna nga aramiden. Kinapudnona, kukuayo amin a banag. Ni Pablo, ni Apolos, ni Pedro, daytoy lubong, biag ken patay, ti agdama ken ti masakbayan. Wen, kukuayo amin dagito. Ket kukuanakayo ni Cristo, ket ni Cristo kukua ti Dios.**
____________________________