Taraon ti Biag...

Ti Nasantoan a Mabasa Ita nga Aldaw, Nobiembre 15, 2009 [Domingo]

Umuna a Mabasa: Nehemiah 1-2

Maikadua a Mabasa: Hosea 12

Ti Ebanghelio Ita nga Aldaw naadaw iti Surat ni San Pablo kadagiti taga-Colosas: 3 ken 4

NAPANGUNGARKAYON a nairaman ken Cristo. Ngarud, birokenyo dagiti adda idiay langit a yan ni Cristo a situtugaw iti tronona, iti makannawan ti Dios. Panunotenyo dagiti adda sadiay, saan a dagiti adda ditoy daga. Ta nataykayon. Naidulinen ti biagyo iti Dios iti panakimaymaysayo ken ni Cristo. Ni Cristo ti pudno a biagyo. Inton agparang, makipagparangkayto met kenkuana ket mauranudkayto iti gloriana!

Ti Daan ken ti Baro a Biag
Ngarud masapul nga iwaksiyo dagiti naidagaan a tarigagay a kas iti immoralidad, kinarugit, kinaderrep, dakes a tarigagay ken kinaagum [ta ti kinaagum maysa a kita ti panagrukbab iti didiosen]. Gapu kadagitoy, agdissuorto ti pungtot ti Dios kadagiti saan nga agtulnog kenkuana. Adda idi tiempo nagbibiagkayo kasta a panaggartem, idi iturayannakayo dagita a tarigagay.

Ngem ita, masapul nga idianyo amin dagitoy: pungtot, derrep ken gura. Dikay agsao iti makapabain. Awan koma ti naalas a balikas nga agaun kadagiti bibigyo. Dikay agiinnulbod, ta inuksubyon ti daan a kinatao agraman dagiti ugalina, ket inkawesyon ti baro a kinatao. Daytoy ti baro a tao a kanayon a mapabpabaro tapno umasping iti Dios a namarsua kenkuana, ket naan-anay ti panakaammoyo kenkuana. Iti kasta, awan Gentil wenno Judio, nakugit wenno saan a nakugit, gangannaet wenno atap a tao, tagabu wenno siwawayawaya, no di ket ni Cristo ti isuamin. Adda ni Cristo iti isuamin.

Dakayo ti tattao ti Dios. Inayat ken pinilinakayo a kukuana. Ngarud, ikawesyon ti kinamanangngaasi, kinaimbag, kinapakumbaba, kinasingpet ken kinaanus. Agiinnanus ken agpipinnakawankayo no adda pagkunaan ti maysa iti sabali. Masapul nga agpipinnakawankayo a kas iti panangpakawan ti Apo kadakayo. Ket kadagitoy amin, inayonyo ti ayat a mamagsinggalut a naan-anay iti isuamin. Ti talna nga ited ni Cristo ti agturay koma kadagiti pusoyo; ta daytoy ti nangawisan ti Dios kadakayo iti maymaysa a bagi. Kanayon koma nga agyamanakayo. Agtalinaed koma kadagiti pusoyo ti mensahe ni Cristo iti isu amin a kinabaknangna. Agsisinnuro ken agbibinnalakadkayo iti amin a kinasirib. Agkantakayo kadagiti salmo, himno ken naespirituan a kankanta , a napno ti pusoyo iti panagyaman iti Dios. Ngarud, amin nga aramiden ken sawenyo, aramidenyo iti nagan ni Apo Jesus. Agyamankayo iti Dios Ama babaen kenkuana.

Dagiti pagrebbengan iti Baro a Biag
Babbai, agtulnogkayo kadagiti assawayo, ta dayta ti rebbengyo nga aramiden a kas Cristiano.

Lallaki, ayatenyo dagiti assawayo, ket diyo rangranggasan ida.

Annak, agtulnogkayo kadagiti nagannak kadakayo, ta daytoy ti makaay-ayo iti Dios.

Amma, diyo rurruroden dagiti annakyo tapno dida maupay.

Dakayo nga adipen, agtulnogkayo iti isu amin kadagiti appoyo, saan laeng a no kitkitaendakayo tapno ay-aywenyo ida, no ket ipapusoyo gapu iti panagraemyo iti Apo. Aniaman nga aramidenyo, ipapusoyo a kasla maipaay iti Apo, saan a kadagiti tattao. Laglagipenyo a gungunaannakayto ti Apo. Awatenyo ti tawid nga agpaay kadagiti tattaona. Ta ni Cristo ti napudno nga Apo a pagserserbianyo. Ti siasinoman nga agaramid iti dakes, agikaronto; ta awan ti idumduma ti Dios iti panangukomna.

Dakayo nga appo, aramidenyo ti nalinteg ken rumbeng kadagiti tagabuyo. Laglagipenyo nga adda met Apoyo sadi langit.

Pammagbaga
Diyo sardayan ti agkararag a sisasalukag ket buyoganyo iti panagyaman. Ikarkararagandakami met tapno ikkannakami ti Dios iti nasayaan a gundaway a mangikasaba iti mensahena ket ibagami ti palimed ni Cristo. Ta daytoy ti gapuna nga addaak ita iti pagbaludan. Idawdawatyo a mailawlawagko daytoy kas rebbengko nga aramiden.

Annadanyo ti tignayyo kadagiti saan a mamati. Usarenyo a naimbag ti tiempo a kaaddayo iti baetda. Kanayon koma a makaparagsak ken makaay-ayo ti panagsaoyo; ammyo koma ti tumutop nga isungbatyo iti uray siasino a tao.

Maudi a Kablaaw
Ipakaammonto kadakayo ni ay-ayatentayo a kabsat a Tikico ti amin a damag maipapan kaniak. Isu ti mapagtalkan iti trabaho ken kaduami nga adipen iti trabaho ti Apo. Ibaonko tapno ibagana ti kasasaadmi amin, ket iti kasta, mabang-arankayo. Makikuyog kenkuana ni Onesimo nga ay-ayaten ken mapagtalkan a kabsat a maysa kadakayo. Ipadamagdanto ti amin a mapaspasamak ditoy.

Pakomustaannakayo ni Aristarco a kaduak a balud, kasta met ni Marcos a kasinsin ni Bernabe. [Inawatyon ti bilin maipapan ken ni Marcos. Inton umay, awatenyo.] Komustakayo kano met kuna ni Jesus a managan Justo. Kadagiti Judio a mamati, dagitoy laeng ti makipagtrabaho kaniak a maipaay iti Pagarian ti Dios, ket adu ti naitulongda.

Pakomustaannakayo ni Epafras a kamkameng met iti grupoyo. Adipen ni Cristo Jesus ket kanayon a sipapasnek a mangikarkararag kadakayo. Idawdawatna iti Dios nga agtalinaedkayo a natibker, natangkenan nga awan pagduaduaanna nga agtungpal kadagiti pagayatanna. Siak ti makasaksi iti kinaanepna nga agtrabaho iti maipaay kadakayo ken kadagiti tattao idiay Laodicea ken Hierapolis. Pakomustaannakayo ni Lucas, ti patpatgentayo a doktor; pakomustaannakayo met ni Demas.

Idanonyo ti pakomustami kadagiti kakabsat idiay Laodicea; pakomustaanyo met ni Nimfas ken ti iglesia nga aggigimong iti balayna. Kalpasan iti panangbasayo iti daytoy a surat, kitaenyo ta mabasa met iti iglesia idiay Laodicea. Kasta met a basaenyo met ti surat nga aggapu idiay Laodicea. Ibagak ken ni Arkipo nga ileppasna ti trabahona a naitalek kenkuana iti panagserbi iti Apo.

Siak ti akinsurat iti daytoy: Kablaaw ni Pablo. Diyo lipatan a sikakawarak!

Sapay koma ta adda kadakayo ti parabur ti Dios.
______________________________________