Sursuruandak Man

[nabulod ti ladawan]

Napili a Daniw Ita a Lawas iti "Taraon ti Biag"



Sursuruandak Man
ni Rudy Ram. Rumbaoa
[nainspiraranak a nangisurat idi 11.23.07 ken naadaw ti paulo ti daniw iti blog ni Ka Eddie P. iti iluko.com a napauloan iti "Sursuruandak Man"]

Nagrigatak addaka nga agragragsak
Ramrambak a di maungpot, di mapugsat;
Pagbabawyak ita ti nagbalin a gasat
Pammagbaga diakto met ida impangak...

Akuek, tiempok amin idi kabanbannuagak
Nasumok dakes a bisio nayaw-awanak;
Nagduduma a ragsak binay-ak ti pamiliak
Pirak a ginastok kasla awan aniamanna kaniak...

Nakapantokkan, addaak pay laeng iti baba
Impasnekmo't nagadal ngem umap-apalak ita;
Napintasen ti trabahom idinto ta umakar-akarak
Gapu't kinabaliwegwegko diak naturpos ti karerak...

Pilid ti biag pudno a dayta't maiparbeng
Ita ta lumakayakon nasakit gayam nga akuen,
Ta no koma maisubli ti naglabas a panawen
Padasek koma't agubing ken agbaro manen...

Nagbalin ketdi ti napalabas a pakaadalak
Tapno daytoy ti dalan a pagbalbaliwak,
Ngem no maminsan sulisog aw-awisennak
Daytoy ti gapuna maitappuakak-maikaranukonak...

Sursuruandak man, idalandak
Ipaayan iti lawag tapno makitak pagnaak,
Didak upayen pataudenyo't namnamak
Tapno adda pagturongan ti masakbayak.

[copyright (c) november 23, 2007 by rudy ram. rumbaoa]