Balligi

[nabulopd ti ladawan]

Napili a Daniw Ita a Lawas
Balligi
ni Rudy Ram. Rumbaoa
[nasurat idi Oktubre 5, 2006]



Adu a rigat ken tuok, Biagko, ti nagpasarak
Iti gangannaet a lugar pudno a naikawaak;
Nayadayoak tapno itag-ay kasasaad ti biag
Ken maikkak raniag masakbayan ti pamiliak.
 
Ita sumangpetakon kalpasan sangapulo a tawen
Iyawidko't balligi tapno pamiliak mabukelen,
Adu nga anus ken sakripisio uray naginnadayo
Kenka Biagko, dagiti annak a dinungdungo!

Agyamanak iti Apo uray adu a tuok naglasatak
Rinibu a milia't nagbabaetan iti lugar a napanak,
Agsubliakon arpadyo nagun-odko't balligi
Adda ragsak a kasukatna, adda kaniak ti pammati.

Wen, sangapulo a tawen a kaawanko't dennayo
Kasla apagbiit ti panawen, aldaw bilbilangenyo,
Nagbalinka a napudno iti pamilia- dayta ti kari
Tapno arapaap ken kalikagumko, di pulos mamki!

Agragsaktay ngarud 'toy aldaw napnoan kaipapanan
Panagdedenna't pamilia daytoy ngata't kararagsakan,
Adu a pannubok ken sulisog umar-arubayan idi
Ngem kitaem Biagko, naumada ta dida nagballigi!

Gangtanta ngaruden ti pagsaingan ti masakbayan
Tapno marubroban ti pabelo ti gagar, agrangrang,
Ken ti balligi nga awit ti pamilia dinatay' itarayan
No di ket kukuatayto latta aginggana't panungpalan!

[copyright by rudy ram.rumbaoa]