Taraon ti Biag...

[nabulod ti ladawan]

Nasantoan a Mabasa:

Marso 14, 2011 [Lunes]
Numbers 21
Numbers 22: 1-20
San Lucas 1: 26-56

Marso 15, 2011 [Martes]
Numbers 22: 21-41
Numbers 23
San Lucas 1: 57-80

Marso 16, 2011 [Mierkules]
Numbers 24
Numbers 25
San Lucas 2: 1-35

Marso 17, 2011 [Huebes]
Numbers 26: 1-51
San Lucas 2: 36-52

Marso 18, 2011 [Biernes]
Numbers 26: 52-65
Numbers 27
Numbers 28: 1-15
San Lucas 3: 1-22

Marso 19, 2011 [Sabado]
Numbers 28: 16-31
Numbers 29
San Lucas 3: 23-38

Nasantoan a Mabasa Ita nga Aldaw, Marso 20, 2011 [Domingo]
Numbers 30
Numbers 31
San Lucas 4: 1-30

Ti Pannakasulisog ni Jesus
[Mat 4: 1-11; Mar 1: 12-13]

NAPNO ni Jesus iti Espiritu Santo idi aggapu idiay Jordan ket inturong ti Espiritu idiay let-ang. Sinulisog sadiay ti Diablo iti uneg ti uppat a pulo nga aldaw. Kabayatan dayta a tiempo, pulos a saan a nangnangan ni Jesus ket kalpasanna, nabisinan.

"No sika ti Anak ti Dios," kinuna ti Diablo, "bilinem nga agbalin a tinapay daytoy a bato."

"Kuna ti Nasantoan a Surat," insungbat ni Jesus. "Saan laeng a tinapay ti pagbiag ti tao."

Kalpasan daytoy, inturong ti Diablo ni Jesus iti nangato a disso ket iti apagdarikmat impakitana kenkuana dagiti amin a pagarian ti lubong. "Itedkonto kenka amin dagitoy a pannakabalin ken dagitoy a kinabaknang," kinuna ti Diablo. "Nayawatda amin kaniak ket mabalinko nga ited iti siasinoman a kayatko a pangtedan. Ngarud, no agrukbabka kaniak, kukuamto amin dagitoy."

"Kuna ti Nasantoan a Surat: 'Agdayawka iti Apo a Diosmo ket isu laeng ti pagserbiam,'" insungbat ni Jesus.

Kalpasan, impan ti Diablo ni Jesus idiay Jerusalem ket pinagtakderna iti kangatoan a paset ti Templo sana kinuna kenkuana: "No Anaknaka ti Dios, tumappuakka man. Ta kuna ti Nasantoan a Surat: 'Bilinento ti Dios dagiti angehelesna a mangaywan kenka.' Kunana pay: 'Tapayaendakanto tapno uray dagiti sakam saan a madunor iti bato.'"
Simmungbat kenkuana ni Jesus, "Kuna ti Nasantoan a Surat: 'Dimo sulisogen ti Apo a Diosmo.'"
Idi naaramiden ti Diablo ti amin a mabalinna a pangsulisog ken Jesus, pinanawanna pay laeng agingga iti dumteng ti sabali a gundaway.



Irugi ni Jesus ti Trabahona idiay Galilea
[Mat 4: 12-17; Mar 1: 14-15]

Nagsubli ni Jesus idiay Galilea nga adda kenkuana ti pannakabalin ti Espiritu Santo. Nagwaras ti damag maipapan kenkuana iti amin a masakupan dayta a lugar. Nangisursuro iti uneg dagiti sinagoga, ket dinaydayaw dagiti amin a tattao.



Maumsi ni Jesus idiay Nazaret
[Mat 13: 53-58; Mar 6: 1-6]

Napan ni Jesus idiay Nazaret, ti ili a dimmakkelanna. Kas kadawyan iti Aldaw ti Panaginana, simrek iti sinagoga. Timmakder a mangbasa iti Nasantoan a Surat, ket nayawat kenkuana ti libro ni profeta Isaias. Inukradna ti nalukot a pagbasaan ket nasarakanna ti paset ti nakaisuratan  dagitoy sumaganad:

        "Adda kaniak ti Espiritu ti Apo,
         Pinilinak a mangikasaba iti Naimbag a Damag kadagiti napanglaw.
         Imbaonnak a mangiwaragawag iti pannakawayawaya dagiti balud,
         Iti pannakakita manen dagiti bulsek,
         Iti pannakaruk-at dagiti maparparigat,
         Ken mangipakaammo iti tiempo a panangsubbot ti Apo kadagiti tattaona."

Linukot ni Jesus ti pagbasaan, inyawatna iti agserserbi sa nagtugaw. Sikikita kenkuana dagiti adda iti sinagoga.

"Ita nga aldaw, natungpalen daytoy a paset ti Nasantoan a Surat a nangngegyo a naibasa," kinunana kadakuada.

Dinayaw dagiti amin a tao, ket nagsiddaawda kadagiti agkakapintas nga imbalikasna. Kinunada, "Saan aya nga isu ti anak ni Jose?"
Ngem simmungbat ni Jesus, "Awan duadua nga ibagayo kaniak daytoy a pagsasao: 'Doktor, agasam ta bagim.' Kunayo ngata pay: 'Aramidem ditoy ilim met laeng dagiti nadamagmi nga inar-aramidmo idiay Capernaum.' Innayon pay ni Jesus: 'Ibagak kadakayo nga awan profeta a madayawan iti ilina met laeng.' Denggenyo daytoy: 'Pudno nga adu dagiti balo idiay Israel idi tiempo ni Elias. Tallo ket gudua a tawen idi a saan a nagtudo, ket napasamak ti nakaro a bisin iti amin a daga. Ngem awan kadakuada iti nakaibaonan ni Elias no di laeng iti maysa a balo idiay Serepta, maysa nga ili idiay Sidon. Adu met dagiti agkukutel iti Israel idi tiempo ni profeta Eliseo; ngem awan kadakuada ti naimbagan malaksid ni Naaman a taga-Siria.'

Kasta unay ti pungtot dagiti amin a tao a nakangngeg. Timmakderda, sada ginuyodguyod ni Jesus nga inruar iti ili. Impanda iti tapaw ti bantay a nakabangonan ti ilida tapno itappuakda iti derraas.

Ngem nagna ni Jesus iti nagbabaetanda ket pimmanaw.