 |
| [ti Nagungar a Jesus] |
Biag nga Agnanayon ti Paskua ti Panagungar
ni Rudy Ram. Rumbaoa
[nasurat Abril 22, 2011]
Perfekto iti amin a kinaperfekto ti Dios
Ta kalikagumanna ti perfekto a hustisia;
Saanna nga impalubos nga itarayantayo ti basol
Ngem ginundawayantay' ketdi ti sagutna
Tapno nawayatayo nga agsalungasing;
Gapu daytoy, nagserra ti ridaw ti langit; ditay' makastrek.
Kasapulan a maibukbok ti dara
Tapno maugasan ti basol ti nataoan
Ken pagbabawian dagiti di maikanatad nga aramid,
Ta uray napno't Dios iti ir-iruken, inay-ayatnatayo;
Isu't gapuna nga imbaonna't bugbugtong nga Anakna
Tapno isu't agbalin a daton ken sakrificio.
Ipalagip ti Biernes Santo ti pannakapasag ni Jesus iti kros-
Awanan mulit ket nagsagaba,
Imbaklayna ti dusa ti sangalubongan
Tapno daytoy ti mamaglukat manen iti ridaw ti Paraiso
Makipagbiagtayo Kenkuana.
Iti bigat ti umuna nga aldaw ti lawas, pinarmekna ni Patay
Bimmangon iti nakaitanemna, awanen ti bangkay.
Ti panagungarna inyegna ti biag nga agnanayon
Nawayawayaan ti lubong iti basol.
[copyright by rudy ram. rumbaoa]
No comments:
Post a Comment