No Dika Agridam

[nabulod ti ladawan]

Napili a Daniw Ita a Lawas

NO DIKA AGRIDAM
ni Rudy Ram. Rumbaoa

Addan Isuna ngem dimo napakadaan
nagyanka't ruar ngem dimo napasungadan
narruay a gagayyem inka pakakumikoman
iti panagsublina pudno nga inna insaganaan

Linak-amna't uyaw-umsi idi likudanna't kalman
iti panagsublina, dimo payen napupuotan;
dagiti ketdi naindagaan ti inka pakariribukan
gapu iti dayta, umay agsingir, umayna lawlawagan.

Kunana: "Imbaga't idi nga agsubliakto iti dennam
tapno malinteg dagiti killo ken dakes a naaramidam
umanayen tiempo nga itedko tapno adda mamaliwam
ngem ad-adda ti gartem iti pusom ti inka sinurotan

Ita, addaka latta nga agkatangkatang
rumbeng a maikeddeng ti umisu a pannusam
pudno a nagsubliak ta dimo payen napakadaan
kas mannanakaw, dimo ammo't orasna nga agsamsam."

Impukkawna pay ti kaaddana dimo ida mapanawan
bisio a nangrakrak ken nakapirpirsayan ti kararuam
dimtengen ti oras tapno sika't agtakder iti sangnguanan
dagiti aramidmo isuda't pagbatayan iti nagbasolam

Wen, addan ti Apo, ngem piman ta dimo napakadaan
kasano ngamin ta nagpapasam ragsak a paggartemam,
ta kunana pay: "Uray agyanka dita ruar a mangpasungad kaniak
No dika agridam, agalibtak, umay kenka ti peggad!"

[copyright by rudy ram. rumbaoa]