PANAWEN TI PUSO

Napili a Daniw Ita a Lawas

[nabulod ti ladawan a naaramat]

PANAWEN TI PUSO
ni Rudy Ram. Rumbaoa
[nasurat 8.14.2011]

Adu met ti panawen ti puso
kas met itoy naimbag-duog a lubong,
ken no pagmaymaysaen amin ida
a mangdagup ti ania a pakabalorantayo.
Adda kinainosente ti kinaubing
a no sadino agarapaap ken agay-ayamtayo,
adda panawen ti panagdakkel
ken aramiden ti bukod a pagayatan.

Adda panawen a tagikuaen
ken panawen a bukkaan,
panawen ti natanang a panaggunay
ken panawen ti nabannayad a pannagna.
Adda met panawen ti panagsursuro
ken panawen a pannakagun-od,
ken adda met panawen a panaginana
no malpas ti amin a trabaho.

Ammotayo ti ragsak ken liday
ta iti plano daytoy ti  nailanad,
kadagiti nabiag agur-uray ruangan ti langit
a pagtaengan tunggal parsua a napudno.
Adu't ladawan ti tunggal biag
ken amin dagitoy trabaho ti arte,
ngem anian a simfonia ti pirak
iti panawen ti puso!

[copyright.august.2011.by.rudy.ram.rumbaoa]