Napili a Daniw Ita a Lawas
 |
| [nabulod laeng ti ladawan a naaramat] |
ni Rudy Ram. Rumbaoa
[nasurat 10.08.2007]
Binigat nga inna sarungkaran
Kaingungotna iti pagtaraknan
Balonna't taraon a pagsangngoan
Agdanggayda a mangan iti lamisaan.
Agliman a tawen nga agsagsagaba
Iti sakit ti panunot a pannakalipat
Nupay saanen a malasin ti asawana
Kenkuana, agari ti pateg ken ayat!
Ammo ni Lakay Mindo nga umil-ilet ti lubongda
Ta saanen a kas iti kabanbannuagan ti pigsana,
Kas met ken Baket Petra;
In-inut metten nga agsalug ti salun-atna.
Para kenkuana, napateg ti pannakakitana
Iti kaingungotna nga awanen ti gawayna,
Nasakit man nga awaten ti kinapudno
Panawen met ti ur-urayen ni Lakay Mindo.
Iti tunggal kanito a panagabanse ti oras
Kasla umir-irut ti pannakaigalut a saan a mawaswas,
Ti marikna a pammateg iti kaaddana iti sidongna
Ken mamalukay iti nabayagen a pannakaulila.
Mapneken ni Lakay Mindo a kasarsarita ti asawana
Uray no di sungbatan ni Baket Petra ta awan masaona,
Saan a mababalaw ti Lakay ti nagbalin a bunga
Ta dina maiturayan ti gasat ni Baketna.
Italek laengen ti Lakay iti Dios Apo
Ta no pumusayto ni Baketna isu't sumaruno,
Ngem patienna nga addanto ragsak iti pagtungpalanda
Sadiay langit, ituloyda ti nagpugsat nga ayan-ayatda!
[copyright.2007.rudy.ram.rumbaoa]
No comments:
Post a Comment