 |
| [nabulod laeng ti ladawan a naaramat] |
KAMBAS
Ni Rudy Ram. Rumbaoa
[11.09.2008]
Sika ti kambas
Iti biagko,
Kenka maay-ayo
Ti pinsel;
Kenka ipulagidna
Ti pinta ni ayat.
Sika ti kambas
A pangipeksaak
Dagiti tagtagaimpek
Tapno kenka
Makitak ti pakabuklan
Dagiti arapaap
A binukel kaunggak.
Sika ti kambas-
Ti biagko
Ti bullalayaw
A napnoan maris
Iti aglawlawko,
'Toy pinsel yugedna
Dagiti dekorasion ti parmata
Yegna't anges iti ladawan
Tapno agpitik puso ket agbiag kaipapanam.
Wen,
Sika ti napintas
A kambas
A pagbiagak
Pangipulagidak
'Toy ayat!
[CR]11.09.08.by.rudy.ram.rumbaoa
No comments:
Post a Comment