Namnama

Napili a Daniw Ita a Lawas

[nabulod laeng ti ladawan a naaramat]

NAMNAMA
ni Rudy Ram. Rumbaoa
[nasurat.8.12.2007/immuna a naipablaak iti
August 2007 Issue ti Fil-Am Observer]

Kadagiti kawaw
a panawen
a panagraira
da buteng ken patay,
nainawka
iti saklot ni dawel;
natagibi
dagiti sardam nga umel.

Iti inkam' panaguray,
nargaan a turog
ti immapay.
Naduayyakam'
iti tiempo a naunday
rigat ken tuok
inkam' imbaklay
a nangpadaan
iti inka isasangbay.

Ngem idi,
ti namnama agpukawen
ngem limtuadka
kas maysa a bituen
a mangsilnag
agkurkurayawen
a demokrasia ken pagilian
nga aglikigen...

Baggakka iti daya
prinsipe ti kappia
iti puso ti pagilia
a naldaangan
inda man maliwliwa.
Ket 'di saibbek,
dung-aw ken saning-i
nasubadanen
iti rag-o ken dir-i!

Anian a nagsam-it
mangnanam iti wayawaya
pudno a kaipapanan
ragsak ken talna.
Dita saklotmo
italekmi kenka
masakbayan
ti Ina a Daga.

[c]2007.by.rudy.ram.rumbaoa