 |
| [nabulod laeng ti ladawan a naaramat] |
PANAGBALBALIW
ni Rudy Ram. Rumbaoa
[nasurat 11.03.2007]
Kunam kaniak: iti panagsublim lintegem
Dagiti biddut a naaramidam
Ngem diak ammo no mariknam ti mariknak ita
Ta tunggal agsublika iti sidongko, makipagsagabaak.
Wen, tunggal agkamangka ket ipeksam kaniak
Dagiti aramid a nakailaw-anam siak ti masugat,
Kunam: um-umkis iti kaunggam ti panagbabawi
Ngem kas karina kadi a maibabawi ti narasi a kari?
A, naulpit unayen nagbanagan ti gasatmo
Awanen napintas a turongen ti panunotmo
Ta kanayon a mayaleng-aleng dagiti pammagbagak
Ket ti masakbayam, sikanto a mismo't mangrakrak.
Kunam pay kaniak: kayatmo a mapunas
Ganna't nagbiddutam a mangipalagip ti napalabas;
Namin-ano kadin nga inikkam gundaway panagbalbaliwmo,
Apay met a malpay daytoy tarigagay ken arapaapmo?
Ngem kunak: waknitam nga umuna't pagnaam
Tapno awan tubeng ken mangsimbalud dagiti sakam,
Ket liklikamon dagiti aramid a pakaikarunokonam
Lipatem ti nalpas, saem ken nagbanagam
Awagam ti Apo ket dinakanto baybay-am
Namnamaem a mabang-aranto dayta kaunggam.
[CR]rudy.ram.rumbaoa
No comments:
Post a Comment