 |
| [nabulod laeng ti ladawan a naaramat] |
ni Rudy Ram. Rumbaoa
[nasurat.12.16.2006]
Ay, Paskuan, Angkuan
Sabali manen ti mapanunotam
Iwagsakmo koman nakaugaliam
Tapno rang-ay ti sumangbay a masakbayam
Wen kunak kenka, Angkuan,
Dimtengen ti Paskua
Dimo kadi maimdengan
Ayug pamaskua a mangngegan?
Ay wen, Paskuan, Paskua
Angkuan, umayka makidanggay, ala,
Kailiam anian a ragsakda
Kadakuada agari't ayat kadagiti puspusoda!
Paskuan, Angkuan, umaykan
Ta inta man ketdi pagbinnuligan;
Maluto nga intayto pagsasangoan
Tupig, puto bungbong wenno suman!
Ala, Angkuan, itugotmonto't gitara
Ta intayto man ketdi maki-Paskua,
Karamanen ti intay' panagpaputok
Iti rebentador tapno samuyeng makigtot!
Itinto aldaw ti Paskua intayto makimisa
Tapno idawat iti Apo itedna't kappia,
Maikkat ti guranggura a napnoan
Ken agari't ayat iti kaunggan.
Ay Paskuan, Angkuan, umaykan
Dika agsadsadut kugtaram nakaugaliam,
Indiam metten panaglimlimom iti kaaduan
Tapno baro a gasat umaynaka sangpetan!
[CR]December.2006.by.rudy.ram.rumbaoa]
No comments:
Post a Comment