Ita a Krismas

Napili a Daniw Ita a Lawas

[nabulod laeng ti ladawan a naaramat]

ITA A KRISMAS
ni Rudy Ram. Rumbaoa
[nasurat.11.27.2007]

Filipinas, awan ngatan kapatgan a regalo no di ti kaaddam
iti kabayag a kaawanmo't dennak kayarigak ulila a demmang,
agmaymaysaak awan ti ragsak, liday ti nangbalud kaniak;
palabsak kadi manen ti Paskua a mangpuris kaunggak?

Palugodannak koma a mangilawlawag dagiti nagkurangak:
ti yaadayok kayatko nga ipaayan nas'yaat a masakbayan,
ngem bayat kaaddak iti adayo, pinatim dagiti tsismis ken sayangguseng
a naidanon kenka gapu iti dayta isun ti sipudna a kayatnak a lipatenen.

Nasakit, Filipinas, ta diak ipagarup a mapukawmo a mamimpinsan ti talek
ken pannakaawat nga innak ar-aramiden banag a sinallukobannakat' sipnget,
iti panunotmo dimo man pinadas a kinaranget dagita a pammarpardaya
tapno kad maikkan ti paglawlawagan dagiti atap nga inyula dayta rikna.

Sikat' kasapulak ita a krismas, Filipinas, tapno adda ragsak ti pamilia.
Sika ti pakabuklan a mangyeg ti pudno nga anag ti Paskua.
Ita a krismas, padasenta nga itanem dagiti biddut a pinaruay
ti kinaulpit ti napalabas tapno mairugi ti baro a namnama ken talinaay.

Padasek a sulnitan ti giwang a rason nakapukawan pateg ken ayat
ket isapulak sungbat dagiti saludsod tapno pamilia di marakrak...

[CR]rudy.ram.rumbaoa.november.2007