Ita a Paskua [Siak ti Malmalday]

Napili a Daniw Ita a Lawas

[nabulod laeng ti ladawan a naaramat]

ITA A PASKUA [SIAK TI MALMALDAY]
ni Rudy Ram. Rumbaoa
[nasurat 12.21.06]

Paskua a napalabas
Siak ti naragsak
Gapu't aldaw
Panangsungbatmo kaniak,
Diak matukod ken malansad
Ti rag-o ken ragsak
A mariknak iti kaunggak.

Gapu kenka,
Nakulding man 'toy pusok
A nabayagen
A di rimmasuk;
Kasla maysa a rosas
Nga inka sinappuyot
Dita ramaymo
A nakalamlamuyot.

Ngem ita a Paskua
Siak ti malmalday
Gapu't sika
Awanen ditoy sibay,
Ayatko a napudno
Inka man inay-ay
Siakon tay kasla
Angesna't mapungsay.

Ket iti panagmaymaysak
Agsasanggala
Lagip ti kalman
Umagibasda,
Ket sellependa man
Ti kararuak ken rikna
Gugorenna't kaunggan
Ket tumrem dagiti lua.

Ita a Paskua,
Siak ti malmalday...

[CR]Rudy.Ram.Rumbaoa.12.2006]