Napili a Daniw Ita a Lawas
![]() |
| [nabulod ti ladawan a naaramat] |
ni Rudy Ram. Rumbaoa
[nasurat.1.29.2012]
Iti laeng naulimek a lugar
A makainanaak, mapabaro
Ta ditoy ti 'yan ti sibibiag a danum
Nga agayus umay kaniak; mangdalus.
Iti laeng naulimek a lugar
A nasursurok iti agayat
Ta ditoy ti lugar a pakariknaak
Pammateg manipud ngato umay kaniak.
Iti laeng naulimek a lugar
Ti pakasarakak ti pudno nga inana,
Amin a panagamak mapukawda
Ket namnamaek a mabendisionannak.
Iti laeng naulimek a lugar
A mapatalgedanakto manen
A siak, anaknak met ti Dios
Ken ni Jesus pagbalinennak a nadalus.
Iti laeng naulimek a lugar
A nasursurok ti agserbi iti Dios iti umno
Ta Isu, intedna ti amin kaniak-
Ket kayatko't magna a kaduak Isuna iti lawag...
[cr.january.2012.by.rudy.ram.rumbaoa]

No comments:
Post a Comment