 |
| [nabulod laeng ti ladawan a naaramat] |
TI LAWAG
ni Rudy Ram. Rumbaoa
[nasurat.1.15.2012]
Adda lawag ti init iti pusok ita nga aldaw
gapu ta Isu bayabayennak iti pannagnak,
pinunnonat' kinangayed-kinamaris ti panagbiagko
ket babaen Kenkuana, nawayawayaan 'toy kararuak.
No aglasat ti sipnget iti sangngoanak
tapno lengdanna ti raya ti lawagna,
subliak a mangpanunot ti bendision a naawatko
ken ibayogko't pusok nga agdaydayaw Kenkuana.
Uray pay iti karirigatan a paset ti panagbiagko
agtalinaedto latta nga agnanayon ti bendisionna,
ket uray pay aniat' mapasamak iti pagnaak
idaydayawkot' Dios, saan a mamaliw ti panagayatna.
Inkarina nga agnanayonto nga adda sadiay
tapno liwliwaenna 'toy kararua a malmalday,
anian a kinapateg ti inna panangigaga
iti daytoy kadakkelan a rag-o a mariknak ita!
Isu ti silaw a manglawag iti lubongko
nupay saan a maris-asul ti tangatangko,
ken uray pay kadagiti kasisipngetan nga aldaw
ti kinarangrangna agtalinaed a sumiripto latta!
[cr.january.2012.by.rudy.ram.rumbaoa]
No comments:
Post a Comment