Awan Agbilang A Di Agpullo

Napili a Daniw Ita a Lawas

[nabulod laeng ti ladawan a naaramat]

AWAN AGBILANG A DI AGPULLO
ni Rudy Ram. Rumbaoa
[nasurat.5.29.2008]

Malagipmo, kunam,
dagiti biddut a naaramidam
iti panagbaro, ita maawatam idan;
dagiti padpadas
dagiti nakasuotam
dagiti dakes nga inar-aramidmo
ti panagapal ken ti kinasuitikmo
ti kinalaus unay a panaggartem iti lasag
ket bukodmo amin nga oras ken tiempo
ti di mapessat a ragrag-o
ket tinagikuam amin ti naindagaan a banag,
ngem dagiti pammagbaga
dimo ida impangag-
ita, maamirismo iti agdama
ket agbabbabawika?

A, baliwegweg,
awan agbilang a di agpullo
no madanonanen ti ungto;
karma wenno aramid di maikanatad
bukodmo a kararua
ti marebbek ken madariwangwang!

Sobra a sursuro ti nagturay kenka
ta pinataud ti dilam ti gita nga insawangna,
kitaem, imbilangdaka a rugit imbellengdaka
iti kaaduan, saanka a pagulidanan.

Kitaem, iti aringgawis ti arapaap a natun-oyam
dimon taliawen tattao a rason nakagunggunaam
iti sobra a panagayatmo iti aramid a mangmang,
naariwengweng panunotmo dimo ammo't turongem
agmaymaysaka ita nga agbibiag-
iti pinanawanen ti panawen...

[copyright.by.rudy.ram.rumbaoa]