Napili a Daniw Ita a Lawas
 |
| [nabulod laeng ti ladawan a naaramat iti daniw] |
No Siak ti Pumusay
ni Rudy Ram. Rumbaoa
[nasurat.3.23.2012/maui]
Ket no siak ti pumusay,
Masapul a maitanemak
Awan koma ti kamposanto
A manglikmut kaniak-
Ta awan ti agmaymaysa iti bassit
A kueba iti panagdalagudog
Ti nakapegpegges a panagpitik ti puso.
Kasano nga ikanawa ti agkumbawa
A puso iti agbabasa a kalub dagiti mata?
Mabayadan ti maudi nga utang
Iti panagleddaang a nalaus unay,
Ket iti panagdaliasat a sumuknal
Iti sagrado a disso-
No daytoy man ti gasatko,
Kaykayatko't maimansayag iti lugar
A pakangngegan iti ringgor ken di pannakaidna
Ti panaggutokgutok ti amin a tao
Gapu kaniak.
Bay-an nga agpuligos
Ti ligay iti amin a suli
Ken nagtagilanga a lubong-
Ti ragsak, komersio, ayat
Ken ti insiwet a panagtaray dagiti saka
Nga agabanse iti rabaw ti ulok.
Uray iti tanemko,
Siakto laeng ti kakaisuna
A makarikna iti disintonado
A ritmiko ti sarado a panagkakabagian.
Ket iti rabaw ti lubong ti nakaro unay
A kinaulimek a mangtutuok kaniak-
Ipupusay...
[copyright.2012.by.rudy.ram.rumbaoa]
No comments:
Post a Comment