Ti Pamumpon

[nabulod laeng ti ladawan a naaramat iti daniw]

Ti Pamumpon
ni Rudy Ram. Rumbaoa
[nasurat.abril.2012.ditoy.maui]

Sino man nga umay mangabbong kaniak
iti lupot ti natay, dina koma dangran
ti bangkay, wenno agimtuod iti adu; 
ta mapadaplis ti korona iti ulok 
a nangbalangat kadagiti buok.
Ti misterio, dagiti pagilasinan, masapul a dina 
gulguloen ta ti kararua rumkuas
nga agkatangkatang nga agturong iti langit
ket mangibatinto dagiti gurgurong tapno agtalinaed
iti pannakatengngel ken pannakawatakwatak.

No ti utek ket sinulidna ti pigsak ken dagsen,
bay-an a mapno ti panunot ta iti tunggal pasetna
maigalut ket agbalinak a kas maysa a buok
nga agpangato a dumakkel, ket ti pigsa ken arte
a nagikut iti nasayaat a panagpampanunot;
maaramidnanto ti kinaimbag, malaksid kenkuana
kunak, ta sisiak laeng iti makarikna ti ut-ot-
ta kas maysa a balud, kalpasanna, maigalut,
ken mapapatay.

No aniaman ti kayat a sawen daytoy a dayag,
mairaman koma a maitanem kaniak, ta gapu ta
siak, martir iti ayat, siguro, managrukbab kadagiti idolo
wenno iti sabali nga ima dagiti relika nga umay: 
kas met iti managpakumbaba a makabael iti amin 
a maaramid ti kararua, ket gapu itoy, 
sumagmamano kadakuada ti nagtured gapu ta sika
ket awanen kaniak, itanemko ti dadduma a pasetmo.
 

[copyright.april.2012.by.rudy.ram.rumbaoa]