Kasla Nasinasina a Nota ti Samiweng

Napili a Daniw Ita a Lawas

[nabulod laeng ti ladawan a naaramat iti daniw]

Kasla Nasinasina a Nota ti Samiweng
[Panglagip ken Emeterio T. Rumbaoa]
ni Rudy Ram. Rumbaoa
[nasurat.hunio.17.2012/maui]

 
Kasla nasinasina a nota ti samiweng a maipatayab
iti tangatang ti kaawanmo iti daytoy nga aldaw,
ta mariknak ti kinaulimek ti distansiam nga awan
manguriro kaniak; makapabessag ket diak mailadawan
daytoy a rikna- nupay siak, ti bagik tagikuaen ti liday.

Denggek amin a kayatko a denggen, ngem kasla
awan ti mangngegko. Denggek dagiti arimpadekmo
ta ammok nga addaka laeng iti asidegko. "Rag-o!" kunam,
ket kalpasanna, nagtung-edak, nagrukob a dimngeg
bayat nga agsangitak kas iti kasin-aw a tudo.

Wen adda rag-o ta addaka manen kaniak, tinaliawka
ket nakitak a nagsadagak kadagita abagam. Makapnek
ken mapunnot' pusok iti ragsak ti samiweng
iti likmutko ket natalgedak manen
ken siwawayaakto nga agsangit.

Nakapimpintas ket diak mailadawan ti emosion,
magunggongnak iti ragsak a maayatan; ken sika,
maipalais kas musika iti adayo a distansia ket makitak
ti nakuridemdem nga isemmo iti adayo-
ti kasumbangir a patag.

"Pangngaasim, pangngaasim!" Kinunak, ngem ammok no
ania ti saludsodek. Ngem saanen, dimtengen ti aldaw nga iyaay
ken ipapanawmo. Ammok ken saanakto a makaidna
iti panangtaliawko kenka ket adda panagamak
gapu ta ti ragsakko mabalin nga isu't pagladingitak.

[copyright.june.2012.by.rudy.ram.rumbaoa]