 |
| [nabulod laeng ti ladawan a naaramat iti daniw] |
Nalabes a Sursuro
ni Rudy Ram. Rumbaoa
[nasurat.6.11.2008]
Dika agpasindayag
ta dimo timon ti biag,
no kunam a pinilinaka;
nagita unay ta dila.
Uray pay dagiti angheles
iti Dios, saanda a nalablabes;
no kayatmo nga ikasaba ti pudno
pagbalinem a nadalus ta puso.
Ngem kasano a pakaammuam
a nabukelka iti gaganakan?
Agbabawika ta maiparbeng
tapno awan sumangbay a buteng...
Agliblibbiang unay nga arapaap
ladawam ti narasi a kayo a naspak,
mariknamto't bara ti init a makasinit
iti aramidmo a killo inkanto kumriit.
Ay, nalabes unayen a sursuro
ta allilawennaka't bukodmo a sao;
dimonto mabaliktad ti kinapudno
ta arigmo't nabulosan a lobo!
[CR.2008. by.Rudy.Ram.Rumbaoa]
No comments:
Post a Comment