 |
| [nabulod ti ladawan a naaramat] |
ni Rudy Ram. Rumbaoa
[nasurat.6.24.2012/maui]
Sika, O, sibibiag a Dios,
Sika ti kamangan,
Sika't sandi ti kararuak,
Sika't pagtalkak.
Kadagiti pinilim a tattao,
Pusoda't agrag-o,
Agtalinaed, agbalin
Nga annakmo a nanakman,
Iti karruahe ti biag,
Sangkamaysada nga aglugan
Ket ti kinarayray ti lawag
A saanto a makaluban.
Punnoek ti pusok
Ken aramidek ti pagragsakan
Ket ti lampara iti abayko
Isu't tarabayko ti rabii.
Agkitakit ti nasikap
A mangtingiting ti panangawat
Ti misterio, ket kasano
Ngarud nga ilulutuadko
Nga irakurak ti sekreto
Ti nagloriaan a santuario?
Ti mangsilnag a ladawan
Ti saan a mabirokan.
Ket bay-ak 'toy bukodko
A kararua nga agessem
A mangtunton ti nailangitan
A kinabaknang a tagtagaimpen.
Nabangon kas safiro
Ti pagtaengan ti kinasirib,
Ket ti napinas a pagnaan
Kas iti balitok a nanglikmut ti Ophir.
Di makita iti uneg
Ti bagi ti pagpaknian,
Ti urbon a leon
A sadiay inna pagiddaan.
Isu't tay-ak ni ragsak,
Ray-aw iti nakaro a ladingit
Isu't kabadangak
Nga agpanunot iti nauneg.
[copyright.june.2012.by.rudy.ram.rumbaoa]
No comments:
Post a Comment