Sino Ita Ti Makatubeng Ken Ni Patay?

Napili a Daniw Ita a Lawas

[Nabulod laeng ti ladawan a naaramat iti daniw]

Sino Ita Ti Makatubeng Ken Ni Patay?
ni Rudy Ram. Rumbaoa
[nasurat.7.8.12./maui]

 
Ken sino ita ti makatubeng ken ni Patay? Iti saan nga agressat
A pannakaibukbok ti danum-baybay iti labes ti tunggal nasipnget
A suli ti lubong, ti pannakaitagbat ti nasilap nga espada,
Ti nanglaylay a mula ken iti awis kenka sadiay ti rono
Dagiti bulbulong, ti gumilgil-ayab nga apuy, ken iti isu amin
A dakes. Ket ti angin iti garangugong iti makatikaw a panagtaul
Ti aso iti sangngoanan ti rupam, ken iti panangpasardeng kenka
Ti payak ti anghel a magmagna iti kalsada...

Nasarakak daytoy a sabong ti rosas iti dalan
Ket kunak: iti uneg ti sirkulo ti lawag ti pagorasan
Ti siitan a dios, itedko kenka, ti nakarubrubrob nga apuy,
Iwarasko't bagik- agdeppaak, agal-alak iti nakabutbuteng
Iti makasisirap ken makapurar a ruot, no siak,
Agparintumengak ket daytoy bukodko nga ima, 
Nakaro unay ti panangparigatna iti bagik...

Ken sino ita ti makatubeng ken ni Patay? Ininumko ti nangisit
A dara iti kopa, ket nagraniag ti bulan nga awan ti nakadlaw, 
Siguro, saanak a napapatay ngem nagtubo iti nakaberberde
Dagiti mula a bain-bain, dagiti siitan a kayo, ken iti itutupuar 
Dagiti agsilud nga insekto, ket dita ti nangrugian iti maysa
Nga abut nga awan pakausaranna, ken rimmubrob ti apuy
Kadagiti magna iti dalan ket nagpusaksak
Ti demonio ket naggudua ti nakuridemdem a lawag ti bulan.

[copyright.by.rudy.ram.rumbaoa]