 |
| [nabulod laeng ti ladawan a naaramat iti daniw] |
Elsie
ni Rudy Ram. Rumbaoa
[nasurat.10.27.2006.maui]
Adda sutil iti kinaulimek ti rabii
di agpakaturog, mariribukan ni Elsie;
no kuan agasug iti napalaus, sana kuna:
"Ay Apo, kaasiannak kad, ala."
Idi, naparatut ni Elsie a makisarsarita
ngem itan mangrugin agsalog salun-atna,
mariknanan napalaus a paksuy ken bannogna
no kasta nga agpagnapagna iti kalsada.
Desdes ti biag, kasta ti inna turongen
saanen a magawidan inna panagbaket,
iti pitopulo a tawenna adun naparagsakna
iti apokonat' tuod, annak, bukod a pamilia.
No kuan, kunana latta:
"Ay Apo, tulongannak kad, ala."
Ngem iti bukodna a pammati
iti mabiit, angesna't inna isubli.
Itay kallabes a tawen, pinalubosanna
immunan, napanen naginanat' kaingungotna;
namnamaenna met a sumaruno isuna
ngem nakasaganan daytoy a mangyawat kararuana.
"Ay Apo, ay Apo! Dimonto kad' ida ikawa
uray awanak dennada, naragsakdanto koma."
Kasta a kasta ti kanayon nga idawatna
sakbay a maturog nga agmaymaysa.
Di mabayag, simmangpet ti pamiliana
manipud abrod intugotda dagiti annakda,
di magawidan liday nagari't kaungganda
makitadat' Ina nga awanen angesna.
Saan a nagbayag, indulindat' bangkayna
piman nga Elsie, dakkel unay ti pakalaglagipanna;
para kadagiti annakna, maysa a bannuar isuna
maitalimeng nga agnanayon iti puso ken panunotda.
[lagip iti maysa nga Ina, nga uray nasapa a nabiyuda-
kinabaelanna pay laeng nga insakad ti narigat a kasasaadda
iti panagbiag ken naikkan iti naranraniag a masakbayan dagiti annakna]
-copyright.by.rudy.ram.rumbaoa
No comments:
Post a Comment