Kros A Saluadko

Napili a Daniw Ita a Lawas

[nabulod laeng ti ladawan a naaramat iti daniw]

Kros A Saluadko
ni Rudy Ram. Rumbaoa
[12.26.2006]

 

Ti kros a saluadko
Simple a mangipalagip kaniak
Iti kinapudno a siak ket kristiano
Iti sadino man a pagturongak
Isut' mangidalan iti pagnaak.

Awan mahika daytoy a kros
Wenno addaan iti galinggaling,
Ngem daytoy ket proteksionko
Iti ania man a pakadangrak.

Saan a daytoy ti pagilasinan
Tapno iti intero a lubong maammuan,
Ngem simple laeng a pannakaawat
Iti nagbaetanmi ti Apo ken Siak.

No kautek ti pitakak iti bulsak
Tapno iruarkot' tulbek wenno kuartak
Ti kros a saluadko ipalagipna
A binayadan ti Apo ti nagbasolak.

Ipalagipna met ti panagyamanko
Iti bendisionna kaniak iti inaldaw
Tapno agserbiak a napudno Kenkuana
Iti amin nga aramid, panunot ken sao.

Ipalagipna pay iti inaldaw-aldaw
Ti kappia ken talna nga adda kaniak
Ken kadagiti makaam-ammo iti Apo
Agtalekda Kenkuana nga awan duadua.

Imetko nga agnanayon daytoy a kros
Tapno ipalagipna nga awanen sabali no di Siak
Ni Jesu-Cristo isu't Apo ti biag
Ket awanen sabali no di laeng Isu.

[copyright.by.rudy.ram.rumbaoa.12.26.2006]