Ibati Dagiti Ladawan ti Agnanayon a Pakalaglagipan

Dadduma Pay...

[Nabulod laeng ti ala a ladawan ti agina]

Ibati Dagiti Ladawan ti Agnanayon a Pakalaglagipan
Ni Rudy Ram. Rumbaoa

MAYSA kadagiti kapintasan wenno naisangsangayan a pakalaglagipak iti kinaubingko ket ti Kodak Commercial a kanayon idi a mabuya iti telebision. Napintas ti liriko ti kanta a naipareha iti melody nga agingga ita, kailiwko pay la denggen.

Iti nasao a tema ti komersial, kasla kayat nga iladawan ti nagaramid iti daytoy a komersial a napintas unay no maala ti ladawan dagiti annak ita ta ubbingda pay. Alisto ngamin ken mabiit laeng ti panagtulid ti panawen. Ket iti uneg dayta a tiempo, napardas met ti panagdakkel dagiti ubbing. No saan, dumakkelda nga awan man a pulos pakalaglagipan ket mapukaw dayta a gundaway tapno maukrad ti napalabas. Awan maipakita ladawan kadakuada bayat kinaubingda.

Iti panangmirak ti photo album-ko ita, ammok ken mamatiak a serioso dagiti nagannakko iti inted a mensahe ti Kodak Commercial.

Adda dita dagiti kakabsatko: Ni Manang Cora, Marlene ken ti buridekmi, ni Sonny. Makaisemak la ngarud ta kas kam la robot a naipatakder idi iti likudan ti puraw a tela a pannakabackground-mi. Aramidenmi amin nga ibaga ti photographer. Makaay-ayo, nakaay-ayat. Imbag ketdin ta adda kolorna dagiti dadduma a ma-develop a picture idi. Ngem sumagmamano pay la kadagitoy a ladawan ti black and white.

"Photographic time capsules," kasta- uray mapirpirpiren ti papel ti ladawan, dakkelto latta a pakalaglagipan daytoy. Ket bayat iti panagdakkelmi nga agkakabsat, in-inut metten a mapukaw dagiti blurred nga snapshots wenno "black and white pictures." Ngem manipud idi, nagbalinen a bisiok ti agala iti ladawan uray no awan ti adalko iti daytoy a benneg. Iti agdama, no adda rummuar a baro modelo ti kamera, wenno video camera, aysus, ikidemko ta ikarigatak a gatangen uray pay kasanot' ingget ngina ti bayadna. Padpadas laeng. Ageksperimento. Kasta, "try and try until you succeed" a kunada. No saan, "trial and error." Ta di kadi agbalinto latta? Ngem saan a dayta ti makagapu, kayatko ti mangukkon iti pakalaglagipak- saan laeng iti pamiliak no di pay ket kadagiti kabagiak, gagayyem ken am-ammok.

No ukradek ti photo album, addada amin dita: ti Apongko a Lakay ken Baket, a nakatakderda iti maysa kadagiti ladawan a pakalaglagipak idi agtawenak la siguro iti lima, a kunam la no security guard-da a mangbambantay kaniak. Wenno, ti ladawan ti umuna a kaanakak, anak ni Manangko- ni Bryan, a nakaay-ayat a buyaen ti kinainosente ti maysa nga ubing. Wenno, ti ladawan ti buridekmi, ni Sonny. Makaay-ayo a buybuyaen ti kinaatiddog ti buokna a kunam la no munmunieka a naipatakder iti maysa a suli ti balay. Sabali laeng ti ladawan ni Baketko nga ubbana ti ubingmi, ni Sofia Monique, a kunam la no adda kabutengna iti sangnguananna ta arigna ti agpaisalakan iti ala a ladawanda nga agina. Nakaay-ayat!

Inspiradoak a manglukib iti tunggal panid ti photo album. Napalabas ngem dakkel ti kaipapananda. Kas koma iti umuna nga aso a regalo daydi nagawan nga amak. Misty ti nagan ti aso, burboran ken mapili pay ti taraonna. Nagbalin ketdi a nakalalagip kaniak daytoy nga asok ta kaeddak pay idi iti katre a pagturogak.

Sabali pay a nakalalagip kaniak, ti ladawan ti panagkasangayko idi agtawenak iti siam. Puypuyotak ti nakasindi a kandela iti rabaw ti birthday cake. Adda iti likudak dagiti padak nga ubbing- adda agkatkatawa, manutsutil kadagiti pada nga ubbing, adda ngirngir ken agrungrungaab. Ngem ne, makaisemak la ngarud ta malasinko iti ladawan ti maysa kadagitoy- ti bestfriend-ko ken karrubak! Iti nasao a ladawan, sumagmamano metten kadagiti am-ammok wenno papagayamko ti napanen iti sabali a biag [Dios koma ti mangliwliwa kadakuada]. dagiti dadduma, addaandan iti bukod a pamilia, negosio, wenno iti abrod. Ngem perme ti pannakadismayak ta black and white pay la idi ti ladawan. Saan a kas ita a panawen ti moderno a teknolohia. Memory card ti mausaren a pakaidulinan tunggal ladawan wenno video clip a maala. No kayatmo nga i-delete, alisto ta maikkatmo a dina oras ti dimo kakaayatan a ladawan wenno video clip. Idi, negative pay la ti mausar. Ngem uray ita, maus-usar met pay la dayta. Inuugma idi, modernon ita- dayta ti diperensiada. Ngem para kaniak, de-kolor man wenno saan, agpada a dakkelto latta ti pakalaglagipak kadagitoy a ladawan nga ala- ipalagipda ti maysa a pakasaritaan kaniak.

Nagganas ketdi a subliasublian ti napalabas. Maysa a batonlagip. Wen, ipalagipna ti linabag ti nagtaudak. Manipud iti kinainosente, panagbarito, panagbaro agingga a naasawaan. Saan la a dayta, ditoy ti nakailaonan ti lagip ken pakasaritaan ti pamiliak. Ket no lukibek ti tunggal panid ti photo album, diak malapdan ti agarapaap. Ta no ngamin pampanunotek iti agdama, kasla di nakapappapati ngem pudno a magun-odko ti nagapuanak iti biag ket ibilangko a bendision amin dagitoy manipud iti Apo. Wen, bendision kunak ta naparaburanak iti anak, addaan iti manangipateg ken managayat nga asawa ken narruay a papagayam. Ket wen, dagitoy ti kinabaknang a dinto matakaw ti sabali kenka.

No mingmingmingak dagiti kabaroan nga ala a ladawan iti photo album, kaaduanen kadagitoy dagiti kaannakak, gagayyem, am-ammok ken kasta met ti bumalasitangen nga anakko. Awan ti adu a ladawanko idi. Uray dagiti nagannak kaniak, ngem makaanay dagitoy a pakaliwliwaak no subliak ida buybuyaen.

Pudno, alaen dagiti nagannak ti ladawan dagiti annak ngem malipatanda met wenno dida met paala iti sabali ti kabukbukodanda a ladawan. Ammoda ketdi a ti panangukkon kadagiti ladawan, bangonenna ti maysa a pakasaritaan ti pamilia- ti pakalaglagipan...