Ti Kapintasan a Matagikua Isu ti Nagbannogan

Dadduma Pay...

[Nabulod ti ladawan a naaramat iti Putnamania Blog]

Ti Kapintasan a Matagikua Isu ti Nagbannogan
Ni Rudy Ram. Rumbaoa

ADDAAK pay la'ng iti elementaria idi sumursurotakon ken ni Apongko a Lakay a mapan mamalon ti merienda ken pangngaldaw dagiti agsekka ken agraep a karrubami iti medyo panakkelen bassit a talonna iti amiananen ti family house-mi ken ti irigasion. Nupay naganus ti panunotko idi, makitak ken mariknak ti regget dagitoy a karrubami nga agtrabaho uray narigat ti mapalag iti init nga agmalmalem. Sa maysa pay, medyo nataengandan. Ngem gaput' ayatda tapno adda iserbida kadagiti bukodda a pamilia, matandananda iti kita ti bagas wenno kuarta. Sabali laeng ti de lata nga inayon ti Apok iti tangdanda no makitana a napintas ti trabahoda. Pangay-ayo, kasta man.

Idi bumaybayagen, sumurotak metten a mapan aggapas wenno agani. Iti daytoy a makitak kadagiti karrubami, kasla mariknak nga adda pateg ti tunggal pagling-etanda. Nupay kalkalainganna ti maitandan kadakuada kas kasukat ti nagbannoganda, dakkel a banag daytoy para kadakuada ta magatangda ti kayatda a gatangen. Ket naabisigko, kayatko met ti agbannog a saan ketdi tapno maramanak ti pagbannogak no di ket adda idi arapaapko a gumatang iti bisikleta. Simurrotak ngarud manipud panagtalon, panagsekka, panagraep agingga iti panagani/panaggapas.

Pudno, narigat ti agkapudotan nga agmalmalem. Ngem no dadduma, mairana ti natutudo nga uray la agkimat wenno aggurruod no manarimaan ti panagraep. Ngem ti pagpintasanna, naragsakkayo nga agtrabaho 'ray no maslepen ti kamiseta/ bado iti ling-et- tuloy latta ti trabaho. Sabali laeng met ti ganas ti agraep no agtudtudo nangruna no adda radio a pagdengganyo kadagiti paborito a programa wenno drama. Ket no inton mayawaten ti bulibolmo, ay, ket adun ti nakalista a gatangek no kastan a maipasukatko iti kuarta ti kaibatogan ti nagbannogak!

No malpasen ti panagtalon, perme nga agam-ambisionak unay. Kasla makitkitakon ti langa wenno klase ti bisikleta a kayatko a gatangen. Saan pay idi nga uso ti mountain bike ngem addan pamalpalutpotak a gatangen ta nokua, mapanak idiay ili tapno mapanak agin-kakambas ti klase ken presio ti bisikleta. Gapu ta kurang laeng ti kuarta nga urnongko, naglakoak iti tinapay/pandesal iti binigat. Pagpiaanna, adda latta dagiti kostumerko- dagiti karrubami met laeng ken no dadduma, dumanonak pay iti kabangibang a barangay tapno aglako sadiay. Naganas ngem masapul nga agriingka a masapa iti bigat. Ngem mano met laeng ti maganansia- dua a pisos ken salapi agingga iti lima a pisos. Ay, nabalor pay laeng ti piso idi! Ilakok ti pandesal iti binting iti dua a bukel. Ngem dadakkel pay laeng ti pandesal idi saan a kas itan a kasla impes ken bimmassiten.

Di latta makaanay ti kuarta ket aglupos met laengen ti modelo ti bisikleta a kursunadak, nanglukatak iti savings-ko iti bangko- a di ammo dagiti nagannakko. Nagpakuyogak ketdi iti maysa kadagiti kaanakanda parents-ko ket inlimedmi daytoy. Ammok, tiemponan tapno magatangko ti umuna a wheelsko- ti bisikleta. Sa maysa pay, dakkelakon tapno sursuroek ti agsalukag iti bukodko a kabaelan ken panglakagan. Ket ditoy a naluktan ti savings account-ko- kaunaan unay a bangkok. Iti bangko, inyawat kaniak ti balasang a teller ti bassit a libreta de bangko- asul ti kolorna ket nadalus ken awan pay naimarka iti tunggal panid daytoy ngem ketdi, nakasaganan tapno maisurat ti innak ideposito.

Iti agarup dandanin makatawen manipud inambisionak ti gumatang iti bisikleta, nakurang latta ti urnongko. Tapno masupusopan ti pagkurangak, sinerrekko payen ti mapan aggatang iti bote ken diyaryo. Ngem kaskasdi a bassit ti magansiak. Pagpiaanna, adda mainayon iti bangkok. Sabali laeng ti napanunotak a mapan aglako iti sorbetes ken ice candy. Bassibassit ngem makaurnong. No mangted idi dagiti nagannakko iti lima a pisos a balonko a mapan agbasa, gudduaek dayta- itubongko iti alkansiak ket no mapnonton, biltakek sako idardaras a mapan ideposito iti bangko.

Kasta a kasta ti pamay-ak agingga a dimmakkelen ti urnongko iti bangko. Kamaudiananna, nadanon met laeng ti aldaw ken nagun-odko met laeng ti dagup nga urnongek. Makagatangak met laengen iti bisikleta, kunak iti bagik. Dagus a nagpakuyogak iti kaanakan da parents-ko a napan iti bangko. Agdagup iti dua ribu a pisos amin. Kasta unay ti ragsakko a nangiruar ti nagbannogak a kuarta. Wen, bunga ti tunggal tedted ti ling-etko. Nangibatiak iti agdagup tallo gasut a pisos ta napianto laeng manen a pangrugiak. Ket idi maiggamak ti kuarta, anian ti siddaawko ta kadaydi la a tiempo a nakaiggemmak iti kasta a kaadu ti kuarta. Diak napnek, dinoblek a binilang ti kuarta iti sangnguanan ti teller ket kasta unay isem daytoy. Nangitugotak pay iti plastik a supot nga isu met laeng ti nangisupotak. Imbolsak iti medyo mangrugin nga agrutrot a pantalonko, impaabayko iti libreta de bangkok ket nagdardaraskamin a nagawid. No kuan, kapkapak ti bulsak ta amkek no mapukawko.

Idi addakamin diay balay, nagampayag a kasla agila ti panunotko. Nagarapaapak manen. No adda masobrak iti igatangko iti bisikleta, iragpinkonto metten ti gumatang iti baro nga aruatek: wen, pantalon, baro a t-shirt, sapatos, medyas, brief ken dadduma pay a kasapulak iti eskuela.

Ket iti sumuno a bigat, daytoy nga aldaw ti nagtulaganmi iti kaanakan da parentsko a mapan gumatang iti ar-arapaapek a bisikleta. Ngem umuna, impudnok kadagiti nagannakko ti planok ken no kasano a nakaurnongak iti kasta a kantidad. Idi naammuanda ti amin, tinapik ti Amak ti abagak nga umis-isem sana kuna: "Kitaem, ammom met gayam ti agbiagen." Isem laeng ti insubalitko, ngem iti unegko, diak magawidanen ti ragsak a mariknak.

Kalpasan ti nasurok a beinte singko a tawen, nupay addan bukodko a kotse- nakadulin pay laeng daydi ginatangko a bisikleta. Wen, daydi kakaisuna a bisikletak. Bunga ti ling-etko no kasano nga ipateg ken gun-oden ti maysa a banag. Wen nupay dakdakkelakon ngem iti bisikleta a ginatangko, daytoy ti kapintasan a pakalaglagipak iti bukodko a nagbannogan.*