 |
| [Nabulod laeng ti ladawan a naaramat iti daniw] |
Akikid ti Dalan
Ni Rudy Ram. Rumbaoa
Ammok, akikid ti dalan
Ta di met nalawa a pagnaan;
Awan makaanay a pagpusiposan
Iti sangnguanan ken sikigan.
Natirad dagiti bato iti pagdaliasatan
Ket rumbeng ida a liklikan, gapuna
Nga Addaka a mangiturong kaniak,
Dinak adaywan ketdi bayabayennak.
Nupay kasta, mautobko,
Kasapulanka a sarikedkedko
Ta no awanka a kabinnuligko;
Nasipnget ken nakiro ti lubongko.
Wen, Kasapulanka iti inaldaw-aldaw
Tapno mailiklikak iti ngarab ti sulisog
Ket ti dalan ti biag aglawag kaniak
Tapno natalgedak iti amin a pagnaak.
Ket nupay makitak nga akikid ti dalan
Ta di met nalawa a pagnaan
Ken awan makaanay a pagsinnabatan,
Sika ketdi ti pudno a dalan ken kalangtayan!
[copyright by rudy ram. rumbaoa]
No comments:
Post a Comment