 |
| [Nabulod laeng ti ladawan a naaramat iti daniw] |
Diak Agragut
Ni Rudy Ram. Rumbaoa
Diak agragut a pumanaw
Iti disso a naggapuak,
Ditoy ti 'yan ti nagtaudak
Nagbalin daytoy a pagtaengak.
Patiek, adda met pagrang-ayan
Iti lugar a nakayanakan;
'Suna lang narigat ti bumaknang
Mabayag, adu ti serkan a pakasuotan.
Diak yapal ti bagik iti sabali
Ngem matakderak dagiti isawangko a kari,
Pakaidayawak met makiragup iti sabali a puli
Daytoy ti kapnekan a kabaelak met ti agballigi.
Ket iti lugar a papanan masapul met nga annadan
Ugali ken takder kapulapol a tattao dimo ida maawatan,
Denggen a naimbag, utobem ti ibagam
Amangan no daytoy ti puon diyo pagkikinnaawatan.
Laglagipen met ken indian a kanayon
Aramid a nainlubongan saan nga agnanayon,
Ta daytoy ti mangisebba ken innaka ikalang
Agbabawikanto ngem ania pay ti maaramidam.
Iti amin nga aramiden dimo koma lipatan
Ti Dios Apo a sarikedkedmo ken karaptam,
Mamatika nga awanto pulos ti pakasaktam
Uray umay dagiti pannubok awantot' pakaan-anoam.
Wen, diak agragut a pumanaw
Iti disso a dimmakkelan ken naggapuak,
Ditoy ti 'yan ti kaipapanak ken ragsak-
Adda kaniak a mangtimon ti pagturongak
Tapno sapulek ti naimbag ken naraniag a gasat.
[copyright 2007 by rudy ram. rumbaoa]
No comments:
Post a Comment