 |
| [Nabulod laeng ti ladawan a naaramat iti daniw] |
Sika ti Apo
Ni Rudy Ram. Rumbaoa
Sikat' pigsak
iti biag,
Sikat' dalan
a pagnaak
ken silaw
a manglawag kaniak.
Sikat' puon
ti amin a banag-
taraon, kinasirib
ken amin a ragsak;
Kenka, agtalekak
ta Sika
awan sabalin a pagtamedak.
Adda kad' pay sabali a kasapulak
no mariknakon ti aglaplapunosan
nga ayatmo kaniak?
Wen, Sika ti Apo iti agnanayon;
Sikat' paggapuan ken panungpalan.
Sindiakto a kanayon
ti pagsaingan tapno agrangrang,
tapno makitak
dagiti unorek a dalan;
bay-am nga asakek
dagiti adu a pannubok
ket diakto agamak
ta awanto ti pagbutngak-
Sikat' kalasag.
Idawatko ketdi kenka, O Apo
a punnoennak
iti namnama a mapabaro
tapno dagiti pagayatam
maiburayko:
"Ti ayat a para iti kaaduan!"
[copyright.by.rudy.ram.rumbaoa]
No comments:
Post a Comment