Iti Salisal: "Masapul ti naannad a pamuspusan tapno makadanon iti papanan"

Dadduma Pay...

[Nabulod laeng ti ala a ladawan a naaramat iti artikulo]

Iti Salisal: "Masapul ti naannad a pamuspusan tapno makadanon iti papanan"
Ni Rudy Ram. Rumbaoa


ITI addakami iti high school ti kasingedan a gayyemko, dakkel unay ti panagilemko kenkuana ta kanayon daytoy a maibaon a mapan makisalisal kadagiti dadduma a pageskuelaan. Manipud iti eskuela a pagbasaanmi, tumtumpaw latta ti naganna no makisalip ken mangabak iti pakisalisalanna. Iti district man wenno regional, dakkel nga apalko kenkuana. Ket gapu iti daytoy, nagdesisionak a makisalisalak met iti marathon.

Pudno, di mailinged ti ilemko kenkuana nupay adda aminen kaniak ti sapsapulen ti maysa a babai: sanikua, guapo, kinataer ken diak ilibak- addaanak met iti kinasirib. Ngem diak ammo ta pagduyosak man daytoy a klase ti ay-ayam- no mabalin, matagikuak amin a klase ti talento. Ngem nagbiddutak gayam, saan amin a banag ket matagikua ti maysa a tao. Adda kabukbukodan a kabaelan ken pagrukodan. 

Agingga a nagkolehiokami, nagturpos, nagtrabaho, naaddaan iti annak- nadanonkon ti maika uppat a pulo ket maysa a tawenko. Diak pay nagun-od ti kalikagumak.

Nupay kasta, intultuloyko latta ti nagtaray kas paset metten ti panagwatwatko ngem agingga laengen sadiay- ta diak met serioso ken diak met simrek koma iti maysa a training program. No makapagdesisionak koma, siguro serkek ti 5k wenno 10k, ngem agtarayak laengen agingga iti kabaelak. Ti arapaapko a makisalisal iti marathon ket agsublisubli iti riknak... no mabalin, agsubliak idi kabanbanuagak. Iti tawenko a dose, no mabalin la koma nga isubli ti rueda ti panawen.

Iti maysa nga aldaw kabayatan ti kaaddak iti trabaho, nakaawatak ti e-mail manipud iti maysa nga atleta a gayyemko. Sinaludsodna kaniak, "Awan kadin paggepmo nga agtaray para iti marathon?"

Naikulengak. Aw-awisennak a talaga ti arapaap a nalpaskon a denisisionan a diakon kayat nga aramiden. Ne, kitaem kad laeng- kalpasan ti agarup beinte siete a tawen! 

Napasennaayak. Malagipko, napalabas laeng ti dua a lawas a nakakondisionak- nakasagana a tumaray ngem insardengko daytoy. Ita, babaen ti awis ti gayyem- ti suportana. Nagdesionak, padasek manen.

Pinilik ti kalgaw a tiempo- kayatko a paneknekan ti undorko iti kastoy a tiempo. Wen, kapudpudotanna unay. Adda dita ti lokal a pasalip, ngem para kaniak, saan a problema basta padasek manen ti agtaray. Ngem masapul nga umuna ti training program tapno diak magulpe iti daytoy a banag. Masapul nga aramidek ti amin nga ibaga ti nakasaad iti training program. Mangrugi iti tallo a milia, siam a milia, beinte a milia- sa aginanaak.

"Anak ti diablo!" nayesngawko laengen. Kastoy gayam ti rigatna. Ngem diak inintonaran daytoy, manso, ipasaksakko latta- uray mariknak nga agal-alakon. Ana ngarud ti mabalin. Kasta a talaga ti maganabko. Kasta ti agarapaap, masapul a gun-oden uray kasanot' rigat ti pannubok masapul nga aramiden.

Ngem no dadduma, no nalamiis ti tiempo, agsasadutak isu nga iti treadmill ti usarek. Kaslaak la umul-uli iti bantay ti panagriknak. No dadduma, maisakripisiok payen uray diak makita ti pamiliak iti aldaw ti Domingo tapno agtarayak laeng. Ngem no magagetak, itugotko payen ti maysa nga anakko iti panagtarayko- inspirasion, ken kasla paset metten iti nailanad a training program-ko.

Iti di agbayag, kasla mariknak nga in-inut a magun-odkon ti nabayagen nga arapaapko- uray lumakayakon. Ken mamatiak nga iti tunggal aldaw a panagtarayko, madanonkonto metten ti beinte siete agingga iti treinta a milia. Ket agpayso, no aramidek daytoy iti inaldaw.

Ket gapu iti daytoy nga arapaap ken kaadun a natarayko, no maminsan, malipatak payen ti mammigat gaput' gagarko nga agtaray iti nasapa a bigat. No maminsan, kalabanko payen ti panaglammin ken paksuyko kalpasan ti lima a milia a tarayek. No dadduma, adda tiempona a nalamiis nupay makuna a kalgaw. Kinapudnona, diak payen mapupuotan wenno malagip no kasano ti kaadayo ti natarayko- ngem masapul a saan a darasudos. Masapul ti naannad ta mamatiak a madanonko ti papanak. 

Wen, masapul met nga aginanaak iti tunggal milia a tarayek. Kayatko nga i-pokus iti tunggal addangko ti panag-training kas paset ti dakdakkel nga arapaap a kayatko a gun-oden. Kanayon nga adda iti panunotko ti saludsod: "Dakkel kadin a banag ti nagun-odak iti daytoy a panagtarayko ken mano pay ngata a panagaddang ti kasapulak tapno madanonko ti pagpatinggaan?" 

Ne pagammuamta addaakon iti pagpatinggaan wenno finish line iti nakurang laeng nga uppat nga oras- nadanonko met laeng ti papanak ngem perme ti paksuy ken kamkamatekon ti angesko!

Kalpasan ti makabulan a panag-trainingko, adda naawatko nga imbitasion a mangaw-awis kaniak a makisalisal iti marathon. "Kayak ngata?" daytat' saludsod. Awan pay desisionko, ngem patiek...kabaelak.*