 |
| [Nabulod laeng ti ladawan a naaramat] |
Sika, O Apo
Ni Rudy Ram. Rumbaoa
Sika
ti paggapuan
ti biag
ti pigsak
ti aramid
ti tiempo
ken darikmat.
Impariknam kaniak
ditoy pusok
ti ayat
tapno punuenna
ti nakarasan a namnama.
Imbus-oymo ti raya ti init
tapno lawaganna dagiti matak
tapno makitak
maimutektekak
ti pudno
a kaipapanan ti biag;
saanmo ketdi nga impalubos
nga agari ti sipnget kaniak
tapno mabulsekak-
mayaw-awan kararuak.
Dimo impalubos
a sibbarotennak ti sulisog
tapno agkurno
iti aramid a naindagaan
a pakailaw-anak.
Ngem Sika, O Apo,
ti
ubbog
ti
biag,
a pakasarakak
ti pudno a ragsak!
Kenka ti ayat!
[CR.2008.by.rudyram.rumbaoa]
No comments:
Post a Comment