Nalabes a Sursuro

[Nabulod ti ladawan a naaramat]


Dika agpasindayag
ta dimo timon ti biag,
no kunam a pinilinaka;
nagita unay ta dila.

Uray pay dagiti angheles
ti Dios, saanda a nalablabes;
no kayatmo ikasaba ti pudno
pagbalinem a nadalus ti puso.

Ngem kasano a pakaammuam
a nabukelka iti gaganakan?
Agbabawika ta maiparbeng
tapno awan sumangbay a buteng...

Agliblibbiang unay nga arapaap
ladawam ti narasi a kayo a naspak
mariknamtot' bara ti init a makasinit
iti aramidmo a killo inkanto kumriit.

Ay, nalabes unayen a sursuro
ta allilawennakat' bukod a sao;
dimo mabaliktad ti kinapudno
ta arigmot' nabulosan a lobo!



NALABES A SURSURO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
[cr]o6.2oo8