Awan Agbilang a Di Agpullo

[Nabulod ti ladawan a naaramat]

Malagipmo kunam:
Dagiti biddut a naaramidam
Itan nataenganka maawatam ida?

Dagiti padas
Dagiti nakasuotan
Dagiti pammagbaga
Maamirismo iti agdama
Ngem dimo inatur biddutmo...

A, baliwegweg,
Awan agbilang a di agpullo
No madanonanen ti ungto;
Karma wenno aramid di maikanatad
Bukodmo a kararua
Ti marebbek ken madariwangwang.

Sobra a sursuro nagturay kenka
Ta pinataud dilam gita nga insawangna
Kitaem, imbilangdaka a rugit imbellengdaka
Iti kaaduan saanka a pagulidanan.

Kitaem, iti aringgawis arapaap a natun-oyam
Dimon taliawen tattao a rason nakagunggunaam
Iti sobra a panagayatmo iti aramid a mangmang
Naariwengweng panunot dimo ammot' turongen
Agmaymaysaka ita nga agbibiag
Iti pinanawanen ti panawen...



AWAN AGBILANG A DI AGPULLO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
[cr/rrr]o5.2oo8.maui